អ្នកឧតុនិយមនៃសាកលវិទ្យាល័យរដ្ឋមូស្គូ បាននិយាយកាលពីថ្ងៃព្រហស្បតិ៍ថា រដ្ឋធានីមូស្គូរបស់ប្រទេសរុស្ស៊ី ក្នុងខែនេះ បានឃើញការធ្លាក់ព្រិលច្រើនបំផុត ក្នុងរយៈពេលជាង ២០០ឆ្នាំ។ 

រូបភាពរបស់សារព័ត៌មាន AFP ពីទីក្រុងដែលមានប្រជាជនប្រហែល ១៣ លាននាក់ បានបង្ហាញថា  ប្រជាជនកំពុងតស៊ូដើម្បីធ្វើដំណើរឆ្លងកាត់គំនរព្រិលធំៗ នៅតាមដងផ្លូវនានា ក្នុងសង្កាត់ភាគកណ្តាលរបស់ខ្លួន។

អ្នកយកព័ត៌មាន AFP បានឃើញថា រថភ្លើងដឹកអ្នកដំណើរជាច្រើនខ្សែ នៅក្នុងតំបន់មូស្គូ ត្រូវបានពន្យារពេល ហើយរថយន្តត្រូវបានជាប់គាំងក្នុងការកកស្ទះចរាចរណ៍យ៉ាងយូរ កាលពីល្ងាចថ្ងៃព្រហស្បតិ៍។

សាកលវិទ្យាល័យនេះ បានបង្ហោះនៅលើប្រព័ន្ធផ្សព្វផ្សាយសង្គមថា៖«ខែមករា គឺជាខែដ៏ត្រជាក់ និងមានព្រិលធ្លាក់ខុសពីធម្មតា នៅក្នុងទីក្រុងមូស្គូ»។

សាកលវិទ្យាល័យ បានបន្ថែមថា៖«នៅថ្ងៃទី ២៩ ខែមករា មជ្ឈមណ្ឌលសង្កេតមើលឧតុនិយមនៃសាកលវិទ្យាល័យរដ្ឋមូស្គូ បានកត់ត្រាកម្ពស់ទឹកភ្លៀងជិត ៩២ មីលីម៉ែត្រ ដែលជាកម្ពស់ទឹកភ្លៀងខ្ពស់បំផុតរួចទៅហើយក្នុងរយៈពេល ២០៣ឆ្នាំ ចុងក្រោយនេះ»។

គំនរព្រិលនៅលើដី បានឡើងដល់កម្ពស់ ៦០ សង់ទីម៉ែត្រ (២៤ អ៊ីញ) នៅក្នុងតំបន់មួយចំនួននៃរដ្ឋធានីនេះ កាលពីថ្ងៃព្រហស្បតិ៍៕