កងកម្លាំងប្រដាប់អាវុធសហរដ្ឋអាមេរិក បានដាក់ពង្រាយនាវាពិឃាតទី ៦ របស់ពួកគេគឺ USS Delbert D Black ទៅកាន់ឈូងសមុទ្រពែក្ស ដូចដែលបានរាយការណ៍ដោយប្រព័ន្ធផ្សព្វផ្សាយលោកខាងលិច រួមទាំង CBS News និង រ៉យទ័រ។

ដោយដកស្រង់សម្តីមន្ត្រីអាមេរិកម្នាក់ដែលមិនបញ្ចេញឈ្មោះ មន្ត្រីអាមេរិករូបនេះ បានបញ្ជាក់ថា សហរដ្ឋអាមេរិកឥឡូវនេះ មាននាវាផ្ទុកយន្តហោះមួយគ្រឿង នាវាពិឃាតចំនួន ៦គ្រឿង និងនាវាប្រយុទ្ធនៅតាមឆ្នេរសមុទ្រចំនួន បីគ្រឿង នៅមជ្ឈិមបូព៌ា។ នាវាពិឃាត Delbert D Black បានមកដល់តំបន់នេះ ក្នុងរយៈពេលពីរថ្ងៃកន្លងទៅនេះ។

ដូចដែលរដ្ឋមន្ត្រីការបរទេស និងជាទីប្រឹក្សាសន្តិសុខជាតិអាមេរិក លោក Marco Rubio បានបញ្ជាក់កាលពីថ្ងៃទី ២៨ ខែមករា ទីក្រុងវ៉ាស៊ីនតោនមិនបានច្រានចោលលទ្ធភាពនៃប្រតិបត្តិការយោធាប្រឆាំងនឹង    អ៊ីរ៉ង់ទេ នឹងក្លាយជាការបង្ការជាមុន។ លោក Rubio បានអះអាងថា សហរដ្ឋអាមេរិកមានបំណងបន្តបង្កើនវត្តមានយោធារបស់ខ្លួន នៅមជ្ឈិមបូព៌ា ដើម្បីឆ្លើយតបទៅនឹងភាពតានតឹងជុំចុងក្រោយបំផុតជុំវិញប្រទេស អ៊ីរ៉ង់។

នាពេលថ្មីៗនេះ ប្រធានាធិបតីអាមេរិក លោក ដូណាល់ ត្រាំ បាននិយាយថា៖«កងនាវាដែលមានកម្លាំងដ៏លើសលប់» កំពុងធ្វើដំណើរឆ្ពោះទៅកាន់អ៊ីរ៉ង់។ លោកបានសម្តែងក្តីសង្ឃឹមថា ទីក្រុងតេអេរ៉ង់ នឹងវិលមក  រកតុចរចា និងឈានដល់កិច្ចព្រមព្រៀង «ដ៏យុត្តិធម៌ និងស្មើភាពគ្នា» ដែលនឹងរួមបញ្ចូលការលុបបំបាត់អាវុធនុយក្លេអ៊ែរទាំងស្រុង។ មេដឹកនាំអាមេរិករូបនេះ បានរំលឹកឡើងវិញថា កាលពីខែមិថុនា ឆ្នាំមុន សហរដ្ឋអាមេរិក បានវាយប្រហាររោងចក្រនុយក្លេអ៊ែរ នៅក្នុងប្រទេសអ៊ីរ៉ង់។ ការវាយប្រហារនេះ ត្រូវបានគេដាក់ឈ្មោះថា ប្រតិបត្តិការវាយលុកពាក់កណ្តាលអធ្រាត្រ (Midnight Hammer)។ លោក ត្រាំ បានថ្លែងថា ការវាយប្រហារលើកក្រោយ នឹង«កាន់តែអាក្រក់ឡើងៗ» ដោយអំពាវនាវឲ្យមានការទប់ស្កាត់កុំឲ្យរឿងនោះកើតឡើង៕