ប្រព័ន្ធផ្សព្វផ្សាយរដ្ឋរបស់សហភាពមីយ៉ាន់ម៉ា បានចេញសេចក្ដីលម្អិតមួយចំនួននៃលទ្ធផលបោះឆ្នោតជាតិកាលពីពេលកន្លងទៅ ដោយបង្ហាញថា គណបក្សដែលគាំទ្រដោយយោធា បានទទួលជ័យជម្នះយ៉ាងលើសលប់នៅក្នុងការបោះឆ្នោតសកល ៣ដំណាក់កាលរបស់ខ្លួន។ នេះជាលទ្ធផលមួយដែលត្រូវបានរំពឹងទុកជាយូរមកហើយ បន្ទាប់ពីដំណើរការនយោបាយដែលគ្រប់គ្រងយ៉ាងតឹងរ៉ឹង និងត្រូវបានធ្វើឡើងក្នុងអំឡុងពេលសង្គ្រាមស៊ីវិល។

គណបក្សសាមគ្គីភាព និងអភិវឌ្ឍន៍សហភាព (USDP) ដែលគាំទ្រដោយយោធា បានគ្របដណ្ដប់លើគ្រប់ដំណាក់កាលនៃការបោះឆ្នោត ដោយឈ្នះសំឡេងភាគច្រើនយ៉ាងលើសលប់ នៅក្នុងសភានីតិបញ្ញត្តិទាំងពីររបស់មីយ៉ាន់ម៉ា។ យោងតាមលទ្ធផលដែលចេញផ្សាយនៅថ្ងៃព្រហស្បតិ៍ និងថ្ងៃសុក្រសប្ដាហ៍នេះ គណបក្សនេះទទួលបាន ២៣២អាសនៈក្នុងចំណោម ២៦៣អាសនៈ នៅក្នុងសភាជាន់ទាប ឈ្មោះថា Pyithu Hluttaw និងទទួលបាន ១០៩អាសនៈ ក្នុងចំណោម ១៥៧អាសនៈ ដែលត្រូវបានប្រកាសរហូតមកដល់ពេលនេះ នៅក្នុងសភាជាន់ខ្ពស់ ឈ្មោះ Amyotha Hluttaw។

កាលពីដើមខែនេះ សម្ព័ន្ធផ្សព្វផ្សាយ Eleven Media Group ដែលគាំទ្រយោធា បានរាយការណ៍ដោយដកស្រង់សម្តីអ្នកនាំពាក្យរបបសឹក លោក Zaw Min Tun ថា សភាមីយ៉ាន់ម៉ា ត្រូវបានគេរំពឹងថានឹងកោះប្រជុំនៅក្នុងខែមីនា ខាងមុខ ដើម្បីជ្រើសរើសប្រធានាធិបតី ហើយរដ្ឋាភិបាលថ្មីមួយនឹងចូលកាន់តំណែងនៅក្នុងខែមេសា។

សមាគមប្រជាជាតិអាស៊ីអាគ្នេយ៍ (អាស៊ាន) ដែលមានសមាជិក ១១ប្រទេស បាននិយាយថា ខ្លួននឹងមិនគាំទ្រដំណើរការនេះទេ ហើយក្រុមសិទ្ធិមនុស្ស និងប្រទេសលោកខាងលិចមួយចំនួនក៏បានរិះគន់ថាជាការបោះឆ្នោតក្លែងក្លាយ។ រដ្ឋាភិបាលយោធាមីយ៉ាន់ម៉ា បានទទូចថា ការបោះឆ្នោតនេះគឺសេរី និងយុត្តិធម៌ ព្រមទាំងមានការគាំទ្រពីសាធារណជន៕