អង្គការសុខភាពពិភពលោក WHO បាននិយាយនៅថ្ងៃសុក្រ (៣០ មករា) នេះថា ហានិភ័យនៃការរីករាលដាលជំងឺនីប៉ាហ៍ (Nipah) ដ៏កាចសាហាវ ចេញពីប្រទេសឥណ្ឌា គឺមានទាប ដោយបន្ថែមថា ខ្លួនមិនណែនាំឱ្យមានការរឹតបន្តឹងការធ្វើដំណើរ ឬពាណិជ្ជកម្មណាមួយឡើយ បន្ទាប់ពីប្រទេសអាស៊ីខាងត្បូងមួយនេះបានរាយការណ៍ពីករណីឆ្លងវីរុសនីប៉ាហ៍ចំនួន ២ករណី។

វត្តមាននៃករណីឆ្លងវីរុសនីប៉ាហ៍ នៅឥណ្ឌា បានជំរុញឱ្យអាជ្ញាធរនៅក្នុងតំបន់អាស៊ី ដូចជាថៃ ម៉ាឡេស៊ី ឥណ្ឌូនេស៊ី សិង្ហបុរី ទីក្រុងហុងកុង ព្រមទាំងប៉ាគីស្ថាន និងនេប៉ាល់ ដែលជាអ្នកជិតខាងរបស់ឥណ្ឌា បង្កើនការត្រួតពិនិត្យផ្នែកសុខភាពយ៉ាងតឹងរ៉ឹងនៅតាមអាកាសយានដ្ឋាន ក្នុងកិច្ចខិតខំប្រឹងប្រែងដើម្បីទប់ស្កាត់ករណីឆ្លង មិនឱ្យរីករាលដាលចូលទៅក្នុងទឹកដីរបស់ពួកគេ។

យោងតាមអង្គការសុខភាពពិភពលោក WHO វីរុសនេះ រាលដាលដោយផ្ទុកលើសត្វប្រចៀវ សត្វច្រឹង និងអាចឆ្លងទៅមនុស្ស និងជ្រូក ដែលអាចបណ្តាលឱ្យមានគ្រុនក្តៅ និងរលាកខួរក្បាល និងមានអត្រាស្លាប់ចន្លោះពី ៤០% ទៅ ៧៥%។ ការផ្ទុះឡើងក្នុងទ្រង់ទ្រាយតូចបែបនេះមិនមែនជារឿងថ្មីនោះទេសម្រាប់ឥណ្ឌា ខណៈករណីឆ្លងជំងឺនីប៉ាហ៍ ត្រូវបានបញ្ជាក់ក្នុងប្រទេសនេះកាលពីចុងខែធ្នូ កន្លងទៅ។ ក្រុមអ្នកជំនាញខាងវីរុស បាននិយាយថា ហានិភ័យដល់ប្រជាជនទូទៅនៅតែទាប ហើយវ៉ាក់សាំងជាច្រើនកំពុងស្ថិតក្នុងការអភិវឌ្ឍ ប៉ុន្តែនៅក្នុងដំណាក់កាលសាកល្បងនៅឡើយ។

គិតត្រឹមខែធ្នូ ឆ្នាំ២០២៥ មានការឆ្លងវីរុសនីប៉ាហ៍ ចំនួន ៧៥០ករណី នៅទូទាំងពិភពលោក ដោយមានអ្នកស្លាប់ចំនួន ៤១៥នាក់ នេះបើយោងតាមសម្ព័ន្ធសម្រាប់ការត្រៀមលក្ខណៈបង្ការជំងឺរាតត្បាត CEPI ដែលកំពុងផ្តល់មូលនិធិដល់ការសាកល្បងវ៉ាក់សាំងដើម្បីជួយបញ្ឈប់វីរុសដ៏កំណាចមួយនេះ៕