មន្ត្រីជប៉ុនទាំងបច្ចុប្បន្ន និងអតីត ព្រមទាំងអ្នកវិភាគនយោបាយ បានលើកឡើងថា ប្រទេសចិនអាចនឹងពិចារណាឡើងវិញនូវយុទ្ធនាការដាក់សម្ពាធដែលមានកាន់តែខ្លាំងឡើងៗ លើនាយករដ្ឋមន្ត្រីជប៉ុន លោកស្រី Sanae Takaichi ប្រសិនបើលោកស្រីទទួលបានជ័យជម្នះយ៉ាងធំធេង នៅក្នុងការបោះឆ្នោតមុនអាណត្តិ នាថ្ងៃទី៨ ខែកុម្ភៈ។

ប៉ុន្មានសប្តាហ៍ក្រោយចូលកាន់តំណែងនៅឆ្នាំ២០២៥ លោកស្រី Takaichi បានបង្កឲ្យកើតជម្លោះការទូតដ៏ធំបំផុតជាមួយទីក្រុងប៉េកាំងជាលើកដំបូង ក្នុងរយៈពេលជាងមួយទសវត្សរ៍ ដោយគូសបញ្ជាក់ជាសាធារណៈ អំពីរបៀបដែលទីក្រុងតូក្យូអាចឆ្លើយតបទៅនឹងការវាយប្រហាររបស់ចិន លើកោះតៃវ៉ាន់ ជាកោះស្វ័យគ្រប់គ្រងដែលចិនអះអាងថា ជាផ្នែកនៃដែនដីរបស់ខ្លួន។

ទីក្រុងប៉េកាំងបានទាមទារឲ្យលោកស្រីដកការកត់សម្គាល់នោះចេញ ដែលលោកស្រីមិនទាន់បានធ្វើដូច្នេះនៅឡើយទេ ហើយបន្ទាប់មកបានដាក់ចេញនូវវិធានការសងសឹកជាបន្តបន្ទាប់ ដែលចាប់ផ្តើមប៉ះពាល់លើសេដ្ឋកិច្ចធំទី៤ របស់ពិភពលោក។

លោក Kazuhisa Shimada ដែលជាអតីតអនុរដ្ឋមន្ត្រីក្រសួងការពារជាតិ បាននិយាយថា៖ «ការគិតដំបូងរបស់ប្រទេសចិន ទំនងជាព្យាយាមផ្តួលរំលំរដ្ឋាភិបាលរបស់លោកស្រី Takaichi។ ការបោះឆ្នោតនេះ គឺមានសារៈសំខាន់ខ្លាំងណាស់។ រដ្ឋាភិបាលដែលខ្សោយ នឹងមិនត្រូវបានគេផ្ដល់តម្លៃនោះឡើយ»។

មេដឹកនាំស្ត្រីដំបូងគេរបស់ជប៉ុន សង្ឃឹមថា នឹងអាចទាញយកអត្ថប្រយោជន៍ពីប្រជាប្រិយភាពដ៏ខ្ពស់របស់លោកស្រី ដែលស្ទើរតែមិនត្រូវបានប៉ះពាល់ដោយការមានភាពរកាំរកូសជាមួយចិន ដើម្បីជំរុញសំឡេងភាគច្រើនស្ដួចស្តើងរបស់ក្រុមចម្រុះរបស់លោកស្រី នៅក្នុងសភា។ កាលពីថ្ងៃព្រហស្បតិ៍ (ទី២៩ ខែមករា ឆ្នាំ២០២៦) ការស្ទង់មតិមួយ បានបង្ហាញថា លោកស្រីអាចនឹងស្ថិតនៅលើផ្លូវត្រូវ ក្នុងការសម្រេចបានតាមការប៉ងទុក តែបណ្ដាអ្នកវិភាគបានពិពណ៌នាអំពីការបោះឆ្នោតនេះថា ជាដំណើរការដែលមិនអាចទាយទុកជាមុនបានបំផុតរបស់ប្រទេសជប៉ុន ពោលគឺជាលើកដំបូងក្នុងរយៈពេលជាច្រើនឆ្នាំ៕