មន្ត្រីរដ្ឋាភិបាល បាននិយាយថា មនុស្សយ៉ាងហោចណាស់២១នាក់បានស្លាប់ និង៧នាក់រងរបួសបន្ទាប់ពីការវាយប្រហារដោយយានដ្រូនរបស់រុស្ស៊ីលើរថយន្តក្រុងដឹកកម្មកររ៉ែ នៅតំបន់ Dnipropetrovsk ប្រទេសអ៊ុយក្រែន។

មន្ត្រីតំបន់ បាននិយាយថា មនុស្សយ៉ាងហោចណាស់៩នាក់ បានរងរបួស ក្នុងការវាយប្រហាររបស់រុស្ស៊ី លើមន្ទីពេទ្យសម្ភពមួយកន្លែង និងអគារលំនៅឋាន នៅទីក្រុង Zaporizhzhia។

រដ្ឋមន្ត្រីថាមពលលោក Denys Shmyhal បានបង្ហោះនៅលើបណ្តាញ Telegram កាលពីថ្ងៃអាទិត្យថា «ថ្ងៃនេះ សត្រូវបានធ្វើការវាយប្រហារដោយចេតនានិងចំគោលដៅលើកម្មករវិស័យថាមពលនៅក្នុងតំបន់ Dnipro»។

នគរបាលនិយាយថា ការវាយប្រហារនេះបានកើតឡើងនៅក្នុងទីក្រុង Ternivka ហើយវីដេអូដែលបានបង្ហោះដោយអង្គភាពសេវាសង្គ្រោះបន្ទាន់រដ្ឋបានបង្ហាញពីរថយន្តក្រុងឆេះមានបង្អួចបែកដែលបានរេធ្លាក់ចេញពីផ្លូវ។ ក្រុមហ៊ុនថាមពល DTEK បាននិយាយនៅក្នុងសេចក្តីថ្លែងការណ៍ថា អ្នកស្លាប់ និងរងរបួសគឺជាបុគ្គលិករបស់ខ្លួនដែលត្រឡប់មកពីប្តូរវេនធ្វើការ។

ការវាយប្រហារទាំងនេះបានកើតឡើងប៉ុន្មានថ្ងៃបន្ទាប់ពីប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយថា ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានព្រមព្រៀងបញ្ឈប់ជាបណ្ដោះអាសន្ននូវការកំណត់គោលដៅលើរដ្ឋធានីគីវ និងទីក្រុងដទៃទៀតរបស់អ៊ុយក្រែន ក្នុងពេលមានសីតុណ្ហភាពត្រជាក់ខ្លាំង ដែលបាននាំមកនូវការលំបាកខ្លាំងដល់ប្រជាជនអ៊ុយក្រែន។