អ៊ីស្រាអែល និយាយថាខ្លួននឹងបញ្ចប់ប្រតិបត្តិការមនុស្សធម៌នៅក្នុងតំបន់ហ្កាហ្សារបស់អង្គការគ្រូពេទ្យគ្មានព្រំដែន ដែលត្រូវបានគេស្គាល់ដោយអក្សរកាត់ MSF បន្ទាប់ពីអង្គការនេះមិនបានផ្តល់បញ្ជីឈ្មោះបុគ្គលិកប៉ាឡេស្ទីនរបស់ខ្លួន ដែលធ្វើឲ្យពលរដ្ឋប៉ាឡេស្ទីននៅក្នុងតំបន់ដែលត្រូវបានហ៊ុមព័ទ្ធមួយនេះបាត់បង់ជំនួយសង្គ្រោះជីវិតបន្ថែមទៀត។

កាលពីខែធ្នូ អ៊ីស្រាអែលបានប្រកាសថាខ្លួននឹងរារាំងអង្គការជំនួយចំនួន៣៧ក្រុម រួមទាំងអង្គការគ្រូពេទ្យគ្មានព្រំដែន(MSF) ពីការធ្វើការងារនៅក្នុងតំបន់ហ្កាហ្សាចាប់ពីថ្ងៃទី ១ ខែមីនា ដោយសារតែមិនបានបញ្ជូនព័ត៌មានលម្អិតអំពីបុគ្គលិកប៉ាឡេស្ទីនរបស់ពួកគេ ដែលធ្វើឲ្យមានការថ្កោលទោសយ៉ាងទូលំទូលាយពីអង្គការមិនមែនរដ្ឋាភិបាល និងអង្គការសហប្រជាជាតិ។ ក្រសួងបាននិយាយកាលពីថ្ងៃអាទិត្យថា «ក្រសួងកិច្ចការជនភៀសខ្លួននិងប្រយុទ្ធប្រឆាំងការប្រឆាំងជ្វីហ្វ កំពុងមានវិធានការដើម្បីបញ្ចប់សកម្មភាពរបស់អង្គការគ្រូពេទ្យគ្មានព្រំដែន (MSF) នៅក្នុងតំបន់ហ្កាហ្សា»។

ក្រសួងបាននិយាយបន្ថែមថា ការសម្រេចនេះធ្វើឡើងបន្ទាប់ពី «អង្គការគ្រូពេទ្យគ្មានព្រំដែន(MSF) មិនបានបញ្ជូនបញ្ជីឈ្មោះបុគ្គលិកក្នុងស្រុក ដែលជាតម្រូវការអនុវត្តចំពោះអង្គការមនុស្សធម៌ទាំងអស់ដែលកំពុងធ្វើប្រតិបត្តិការនៅក្នុងតំបន់»។ ក្រសួងបានចោទប្រកាន់កាលពីពេលមុនថា បុគ្គលិក MSF ពីរនាក់មានទំនាក់ទំនងជាមួយក្រុមហាម៉ាសប៉ាឡេស្ទីននិងក្រុមជីហាដអ៊ីស្លាមនិយមដែលអង្គការសប្បុរសធម៌មួយនេះបានច្រានចោល។

កាលពីថ្ងៃអាទិត្យ ក្រសួងបាននិយាយថា អង្គការ MSF បានប្តេជ្ញាកាលពីដើមខែមករាក្នុងការចែករំលែកបញ្ជីឈ្មោះបុគ្គលិកតាមតម្រូវការរបស់អាជ្ញាធរអ៊ីស្រាអែល ប៉ុន្តែនៅទីបំផុតបានបញ្ចៀសការបញ្ជូនឈ្មោះ ដោយលើកឡើងពីការព្រួយបារម្ភពីសុវត្ថិភាពបុគ្គលិក និងកង្វះការធានាអំពីរបៀបដែលព័ត៌មាននឹងត្រូវបានប្រើប្រាស់។