បេក្ខជនមួយរូបមកពីគណបក្សប្រជាធិបតេយ្យ របស់សហរដ្ឋអាមេរិក បានឈ្នះការបោះឆ្នោតពិសេសមួយសម្រាប់អាសនៈព្រឹទ្ធសភារបស់រដ្ឋតិចសាស់ (Texas) ក្នុងសំឡេងគាំទ្រដល់ទៅពីរខ្ទង់ ដោយដណ្តើមយកការគ្រប់គ្រងពីគណបក្សសាធារណរដ្ឋ ជាលើកដំបូងក្នុងរយៈពេលជាច្រើនទសវត្សរ៍ ខណៈបេក្ខភាពដែលចាញ់ឆ្នោត បានហៅលទ្ធផលនេះកាលពីថ្ងៃអាទិត្យ (១ កុម្ភៈ) ថាជា «សារដាស់តឿន» សម្រាប់ការបោះឆ្នោតពាក់កណ្តាលអាណត្តិនាពេលខាងមុខ។

ជ័យជម្នះសម្រាប់អាសនៈដែលកាន់កាប់ដោយបក្សសាធារណរដ្ឋ ៤អាណត្តិមកហើយ បានកើតឡើងបន្ទាប់ពីជ័យជម្នះជាបន្តបន្ទាប់ក្នុងរយៈពេលប៉ុន្មានខែថ្មីៗនេះសម្រាប់សមាជិកគណបក្សប្រជាធិបតេយ្យ នៅក្នុងការបោះឆ្នោតតាមមូលដ្ឋាន និងរដ្ឋ នៅទូទាំងសហរដ្ឋអាមេរិក ដោយផ្តល់ក្តីសង្ឃឹមយ៉ាងខ្លាំងសម្រាប់គណបក្សប្រជាធិបតេយ្យ ដែលកំពុងស្វះស្វែងដណ្តើមអំណាចមកវិញនៅចុងឆ្នាំនេះ។

លោក Taylor Rehmet សមាជិកបក្សប្រជាធិបតេយ្យ និងជាអតីតយុទ្ធជនកងទ័ពអាកាសអាមេរិក បានឈ្នះកាលពីថ្ងៃសៅរ៍ នៅក្នុងតំបន់អភិរក្សនិយម Tarrant ជិតទីក្រុង Dallas នៃរដ្ឋតិចសាស់ ដោយសំឡេងគាំទ្រជាង ១៤% លើសសកម្មជនមកពីបក្សសាធារណរដ្ឋ លោកស្រី Leigh Wambsgans ដែលលោកប្រធានាធិបតី Donald Trump បានជំរុញឱ្យអ្នកបោះឆ្នោត សម្ដែងការគាំទ្រដល់លោកស្រី។

ក្នុងសេចក្តីថ្លែងការណ៍មួយកាលពីថ្ងៃអាទិត្យ លោកស្រី Wambsgans បានអបអរសាទរលោក Rehmet ចំពោះជ័យជម្នះរបស់លោក ហើយបានហៅជ័យជម្នះរបស់បក្សប្រជាធិបតេយ្យថាជា «ការដាស់តឿន» សម្រាប់អ្នកសាធារណរដ្ឋ ទាំងនៅក្នុងតំបន់ និងថ្នាក់ជាតិ។ អ្នកប្រជាធិបតេយ្យបានលើកឡើងថា ជ័យជម្នះទាំងនេះជាភស្តុតាងនៃសន្ទុះកើនឡើង មុនពេលចូលដល់ការបោះឆ្នោតពាក់កណ្តាលអាណត្តិនៅខែវិច្ឆិកា ឆ្នាំ២០២៦នេះ ហើយក៏ជាពេលវេលាដែលការគ្រប់គ្រងសភាអាមេរិក ស្ថិតក្នុងភាពមិនប្រាកដប្រជា៕