សមាជិកសភាមួយរូបបាននិយាយកាលពីថ្ងៃអាទិត្យ ថាក្មេងប្រុសអាយុ៥ឆ្នាំឈ្មោះ Liam Conejo Ramos និងឳពុករបស់គេបានវិលត្រឡប់ទៅកាន់ផ្ទះរបស់ពួកគេនៅជាយក្រុង Minneapolis វិញហើយ ក្រោយត្រូវបានឃុំខ្លួនដោយក្រុមមន្ត្រីអនុវត្តន៍ច្បាប់អន្តោប្រវេសន៍អាមេរិក និងបានឃុំនៅមណ្ឌលឃុំឃាំងមួយក្នុងរដ្ឋ Texas។

កាលពីថ្ងៃសៅរ៍ ចៅក្រមសហព័ន្ធមួយរូបបានបញ្ជាឱ្យដោះលែងលោក Adrian Conejo Arias និងកូនប្រុសរបស់លោក ដែលមន្ត្រីអន្តោប្រវេសន៍បានឃុំខ្លួនក្នុងអំឡុងពេលឆ្មក់បង្ក្រាបនៅរដ្ឋ Minnesota។ លោក Joaquin Castro តំណាងរាស្ត្រសហរដ្ឋអាមេរិក មកពីគណបក្សប្រជាធិបតេយ្យរដ្ឋ Texas បានសរសេរនៅក្នុងសារមួយនៅលើបណ្តាញសង្គមថា លោកបានទៅយកពួកគេនៅយប់ថ្ងៃសៅរ៍នៅមណ្ឌលឃុំឃាំង ហើយបាននាំពួកគេត្រឡប់ទៅរដ្ឋ Minnesota វិញនៅថ្ងៃអាទិត្យ។

លោក Castro បាននិយាយថា ឥឡូវនេះក្មេងប្រុស Liam បានត្រលប់មកផ្ទះវិញហើយ ជាមួយនឹងមួក និងកាតាបរបស់ពគេ។ពួកលោកនឹងមិនឈប់ទេ រហូតដល់កុមារ និងគ្រួសារទាំងអស់ត្រលប់មកផ្ទះវិញ។

គួរឲ្យដឹងថា ក្មេងប្រុសជនជាតិអេក្វាឌ័រ និងឪពុករបស់គេ ដែលបានចូលសហរដ្ឋអាមេរិកដោយស្របច្បាប់ក្នុងនាមជាអ្នកដាក់ពាក្យសុំសិទ្ធិជ្រកកោន ត្រូវបានឃុំខ្លួននៅក្នុងមណ្ឌលឃុំឃាំងមួយក្នុងទីក្រុង Dilley រដ្ឋ Texas៕