រាប់ពីប្រទេសជប៉ុន រហូតដល់ប្រេស៊ីល ការបោះឆ្នោតអាចបន្ថែមភាពមិនប្រាកដប្រជាបន្ថែមទៀត នៅឆ្នាំនេះ ដល់ទីផ្សារដែលត្រូវបានរងគ្រោះរួចហើយ ដោយសារការប្រែប្រួលគោលនយោបាយរបស់សហរដ្ឋអាមេរិក និងភាពតានតឹងកាន់តែខ្លាំងឡើងៗផ្នែកភូមិសាស្ត្រនយោបាយ។  

នៅតំបន់អាស៊ី ការបោះឆ្នោតរបស់ជប៉ុន នាចុងសប្តាហ៍ខាងមុខនេះ គឺជាព្រឹត្តិការណ៍ដែលមិនអាចទាយទុកជាមុនបានបំផុតជាលើកដំបូង ក្នុងរយៈពេលជាច្រើនឆ្នាំ ខណៈដែលការបោះឆ្នោត នៅតំបន់អាមេរិកឡាទីន នឹងសាកល្បងការផ្លាស់ប្តូរស្តាំនិយមរបស់តំបន់នេះ។ 

ការបោះឆ្នោតមុនអាណត្តិរបស់ជប៉ុន នៅថ្ងៃទី៨ ខែកុម្ភៈ អាចនឹងធ្វើឲ្យមានការចំណាយបន្ថែមក្នុងប្រទេសឧស្សាហកម្មលូតលាស់ដែលមានបំណុលច្រើនបំផុតរបស់ពិភពលោក ដោយប្រៀបធៀបមូលដ្ឋានបំណុលនឹងផលិតផលក្នុងស្រុកសរុប (GDP)។ លោកស្រីនាយករដ្ឋមន្ត្រី Sanae Takaichi ចង់ប្រែក្លាយប្រជាប្រិយភាពផ្ទាល់ខ្លួនទៅជាការគាំទ្រ ចំពោះគោលនយោបាយសារពើពន្ធដ៏ធំរបស់លោកស្រី និងជំរុញជំហររដ្ឋាភិបាលចម្រុះរបស់លោក នៅក្នុងសភា។ ការស្ទង់មតិចុងក្រោយបំផុតបង្ហាញថា ការផ្ដល់ទំនុកចិត្តលើរូបលោកស្រី បានធ្លាក់ចុះបន្តិច។ 

នៅតំបន់អឺរ៉ុប ការបោះឆ្នោតខែមេសារបស់ប្រទេសហុងគ្រី គឺជាឱកាសដ៏ល្អបំផុតជាលើកដំបូងរបស់គណបក្សប្រឆាំង ក្នុងរយៈពេលជាច្រើនឆ្នាំ ដើម្បីបញ្ចប់ការដឹកនាំរយៈពេល ១៦ឆ្នាំរបស់លោកនាយករដ្ឋមន្ត្រី Viktor Orban។ ក្តីបារម្ភអំពីការចំណាយនៃការរស់នៅ គឺខ្ពស់ ហើយលោក Orban បានប្រើប្រាស់ការផ្តល់ជូនផ្នែកហិរញ្ញវត្ថុ ដើម្បីបន្ធូរបន្ថយកង្វល់របស់អ្នកបោះឆ្នោត។ 

សម្រាប់ចក្រភពអង់គ្លេស ជាធម្មតា ការបោះឆ្នោតមូលដ្ឋានមិនសូវទាក់ទាញចំណាប់អារម្មណ៍របស់វិនិយោគិនបរទេសនោះឡើយ ប៉ុន្តែការបោះឆ្នោតក្នុងខែឧសភា អាចនឹងធ្វើឲ្យមានការយកចិត្តទុកដាក់ពិសេស។ ទីផ្សារមានភាពរសើប ដោយសារសញ្ញា ដែលបង្ហាញថា គណបក្សការងារដែលកំពុងកាន់អំណាចរបស់លោក Keir Starmer អាចត្រូវបានជំនួស ដូចដែលបានឃើញដោយការលក់ចេញមូលបត្របំណុលថ្មីៗនេះ។ 

ប្រធានាធិបតីប្រេស៊ីល លោក Luiz Inacio Lula da Silva កំពុងនាំមុខនៅក្នុងការស្ទង់មតិសម្រាប់ការបោះឆ្នោតខែតុលា។ លោក Lula វ័យ ៨០ឆ្នាំ ដែលស្វែងរកអាណត្តិទី៤ បានដោះស្រាយឲ្យមានការផ្អាកជម្លោះជាមួយប្រធានាធិបតីអាមេរិកលោក Donald Trump ទោះបីជាមានការប៉ះទង្គិចគ្នា ជុំវិញបញ្ហាផ្សេងៗ ជាពិសេសពន្ធគយ។ 

រីឯការបោះឆ្នោតពាក់កណ្តាលអាណត្តិរបស់សហរដ្ឋអាមេរិក នៅខែវិច្ឆិកា គឺជាដំណើរការនឹងកំណត់ថា តើក្រុមណាគ្រប់គ្រងសភា ហើយវាក៏ជាការសាកល្បងដ៏សំខាន់មួយ សម្រាប់លោក Trump ផងដែរ។ លទ្ធភាពចំណាយ គឺជាបញ្ហាដ៏ក្តៅគគុកមួយ។ ការស្ទង់មតិបង្ហាញថា ជនជាតិអាមេរិក ជាទូទៅមិនពេញចិត្តនឹងការគ្រប់គ្រងសេដ្ឋកិច្ចរបស់លោក Trump ឡើយ។ ជាប្រវត្តិសាស្ត្រ គណបក្សរបស់អ្នកកាន់តំណែង តែងតែរងផលប៉ះពាល់ អំឡុងការបោះឆ្នោតពាក់កណ្តាលអាណត្តិ៕