ក្រសួងការបរទេសរុស្ស៊ី បាននិយាយកាលពីថ្ងៃចន្ទ (២ កុម្ភៈ) ដោយដកស្រង់សម្តីលោករដ្ឋមន្ត្រី Sergei Lavrov ថា រុស្ស៊ីនឹងចាត់ទុកការដាក់ពង្រាយកងកម្លាំងយោធាបរទេស ឬហេដ្ឋារចនាសម្ព័ន្ធណាមួយនៅអ៊ុយក្រែន ថាជាអន្តរាគមន៍ពីបរទេស ហើយចាត់ទុកកងកម្លាំងទាំងនោះជាគោលដៅស្របច្បាប់។

សេចក្ដីថ្លែងការណ៍របស់ក្រសួងរុស្ស៊ី គឺជាការឆ្លើយតបទៅនឹងសំណួរជាច្រើនដែលសាកសួរទៅកាន់លោក Lavrov ហើយប្រមុខការទូតរូបនេះក៏បានលើកសរសើរដល់កិច្ចប្រឹងប្រែងសន្តិភាពរបស់ប្រធានាធិបតីអាមេរិក លោក Donald Trump និងបាននិយាយថា លោក Trump បានយល់ពីមូលហេតុជាមូលដ្ឋាននៅពីក្រោយជម្លោះនេះ។ សហរដ្ឋអាមេរិកបានដឹកនាំកិច្ចចរចាដែលមានបំណងបញ្ចប់ជម្លោះជិត ៤ឆ្នាំមកនេះនៅអ៊ុយក្រែន ហើយកិច្ចប្រជុំត្រីភាគីលើកទីពីរ ជាមួយតំណាងរុស្ស៊ី និងអ៊ុយក្រែន នឹងធ្វើឡើងនៅសប្តាហ៍នេះនៅអេមីរ៉ាតអារ៉ាប់រួម។

ក្រសួងការបរទេសទីក្រុងមូស្គូ បាននិយាយនៅលើគេហទំព័ររបស់ខ្លួនថា «ការដាក់ពង្រាយអង្គភាពយោធា សម្ភារៈ ឃ្លាំង និងហេដ្ឋារចនាសម្ព័ន្ធផ្សេងទៀតរបស់បណ្តាប្រទេសលោកខាងលិច នៅអ៊ុយក្រែន គឺជារឿងមិនអាចទទួលយកបានឡើយសម្រាប់រុស្ស៊ី ហើយនឹងត្រូវបានចាត់ទុកថាជា ការជ្រៀតជ្រែកពីបរទេស ដែលបង្កការគំរាមកំហែងដោយផ្ទាល់ដល់សន្តិសុខរបស់រុស្ស៊ី»។

សេចក្ដីថ្លែងការណ៍បន្តថា បណ្តាប្រទេសលោកខាងលិច - ដែលបានពិភាក្សាអំពីលទ្ធភាពដាក់ពង្រាយកងកម្លាំងទៅកាន់អ៊ុយក្រែន ដើម្បីជួយធានាកិច្ចព្រមព្រៀងសន្តិភាពណាមួយ - ត្រូវតែយល់ឱ្យច្បាស់ថា «ក្រុមយោធាបរទេសទាំងអស់ រួមទាំងក្រុមយោធាអាល្លឺម៉ង់ផងដែរ ប្រសិនបើដាក់ពង្រាយនៅអ៊ុយក្រែន នឹងក្លាយជាគោលដៅស្របច្បាប់សម្រាប់កងកម្លាំងប្រដាប់អាវុធរុស្ស៊ី»៕