ទីភ្នាក់ងារសារព័ត៌មានផ្លូវការ Wafa បានរាយការណ៍កាលពីថ្ងៃចន្ទថា ប្រធានអាជ្ញាធរប៉ាឡេស្ទីន លោក ម៉ាខ្មូដ អាបាស (Mahmoud Abbas) បាននិយាយថា ការបោះឆ្នោត នឹងត្រូវធ្វើឡើង នៅថ្ងៃទី ០១ ខែ   វិច្ឆិកា សម្រាប់ក្រុមប្រឹក្សាជាតិប៉ាឡេស្ទីន(PNC) ដែលជាសភានៃអង្គការរំដោះប៉ាឡេស្ទីន (PLO)។

នេះគឺជាលើកដំបូងដែលសមាជិកនៃក្រុមប្រឹក្សានេះ នឹងត្រូវបានជ្រើសរើស ដោយការបោះឆ្នោតដោយផ្ទាល់ពីប្រជាជន ខណៈពេលដែលកាលពីអតីតកាល ពួកគេត្រូវបានតែងតាំង ឬជ្រើសរើសពីក្នុងអង្គការនេះ។

លោក អាបាស ដែលជាប្រធានទាំងអាជ្ញាធរប៉ាឡេស្ទីន និង PLO បានចេញក្រឹត្យមួយ ដោយនិយាយថា     «ការបោះឆ្នោតនេះ នឹងត្រូវធ្វើឡើង នៅគ្រប់ទីកន្លែងដែលអាចធ្វើទៅបាន ទាំងនៅក្នុង និងក្រៅដែនដីប៉ាឡេស្ទីន ដើម្បីធានាបាននូវការចូលរួមយ៉ាងទូលំទូលាយបំផុតរបស់ប្រជាជនប៉ាឡេស្ទីននៅទីណាក៏ដោយ ដែលពួកគេរស់នៅ»។

ក្រុមប្រឹក្សាជាតិប៉ាឡេស្ទីន(PNC) បានបម្រើការជាសភារបស់អង្គការរំដោះប៉ាឡេស្ទីន (PLO)។

ក្រុមប្រឹក្សានេះ ត្រូវបានគ្រប់គ្រងដោយចលនា Fatah ដែលជាចលនានយោបាយរបស់លោក អាបាស ដែលត្រូវបានបង្កើតឡើងដោយលោក Yasser Arafat មេដឹកនាំប្រវត្តិសាស្ត្ររបស់ប៉ាឡេស្ទីន ដែលបានស្លាប់ នៅក្នុងឆ្នាំ ២០០៤៕