ក្រុមហាម៉ាសបាននិយាយនៅថ្ងៃចន្ទថា ខ្លួនបានបញ្ចប់ការរៀបចំ ដើម្បីប្រគល់ទ្រព្យសកម្មនៃរដ្ឋាភិបាល និងរដ្ឋបាលរបស់ខ្លួន ទៅឲ្យគណៈកម្មាធិការជាតិហ្កាហ្សា ដែលត្រូវបានគេរំពឹងថា នឹងគ្រប់គ្រងតំបន់ហ្កាហ្សា នៅពេលដែលគណៈកម្មាធិការនេះចូលទៅក្នុងទឹកដីតាមរយៈច្រកព្រំដែនរ៉ាហ្វា (Rafah)។

អ្នកនាំពាក្យហាម៉ាស លោក Hazem Qassem បាននិយាយថា ការប្រគល់ នឹងចាប់ផ្តើមភ្លាមៗ នៅពេលដែលគណៈកម្មាធិការនេះ មកដល់តំបន់ហ្កាហ្សា ហើយនឹងត្រូវធ្វើឡើងដោយមានតម្លាភាព និងទូលំទូលាយ នៅគ្រប់វិស័យ។

លោកបាននិយាយថា ស្ថាប័នកម្រិតខ្ពស់មួយ ត្រូវបានបង្កើតឡើង ដើម្បីត្រួតពិនិត្យដំណើរការនេះ រួមទាំងតំណាងនៃក្រុមប៉ាឡេស្ទីន មេដឹកនាំកុលសម្ព័ន្ធ ឥស្សរជនសង្គមស៊ីវិល និងអង្គការអន្តរជាតិ។

លោក Qassem បានជំរុញឲ្យគ្រប់ភាគីទាំងអស់សម្របសម្រួលការងាររបស់គណៈកម្មាធិការ ដោយនិយាយថា វាមានសារៈសំខាន់សម្រាប់ការងើបឡើងវិញរបស់តំបន់ហ្កាហ្សា បន្ទាប់ពីអ្វីដែលលោកបានពិពណ៌នាថា ជា «គ្រោះមហន្តរាយ» ដែលបានបណ្តាលមកពីសង្គ្រាមអ៊ីស្រាអែលរយៈពេលពីរឆ្នាំ។

ទោះជាយ៉ាងណាក៏ដោយ សមាជិកម្នាក់នៃគណៈកម្មាធិការជាតិសម្រាប់ការគ្រប់គ្រងតំបន់ហ្កាហ្សា បាននិយាយថា បញ្ហាបច្ចេកទេសរហូតមកដល់ពេលនេះ បានរារាំងសមាជិកគណៈកម្មាធិការពីការចូលទៅក្នុងតំបន់នេះ តាមរយៈច្រកព្រំដែនរ៉ាហ្វា។

ថ្លែងនៅក្នុងសន្និសីទសារព័ត៌មានមួយ លោក Aed Yaghi បាននិយាយថា គណៈកម្មាធិការសង្ឃឹមថា នឹងមកដល់ក្នុងរយៈពេលប៉ុន្មានថ្ងៃខាងមុខនេះ ប៉ុន្តែមិនបានបញ្ជាក់លម្អិតអំពីឧបសគ្គនោះទេ។ សមាជិក     គណៈកម្មាធិការម្នាក់ទៀត ដែលសុំមិនបញ្ចេញឈ្មោះ បាននិយាយថា ស្ថាប័ននេះ មិនទាន់មានទីស្នាក់ការកណ្តាល ឬថវិកាប្រតិបត្តិការនៅឡើយទេ។ លោកបាននិយាយថា អគារ ឬដីមួយកន្លែង នៅក្នុងទីក្រុងហ្កាហ្សា អាចត្រូវបានជួល ដើម្បីចាប់ផ្តើមការងារ ហើយថា មិនទាន់ទទួលបានមូលនិធិនៅឡើយទេ៕