អ្នកនាំពាក្យទីស្នាក់ការកណ្តាលយោធា SHAPE របស់សម្ព័ន្ធយោធាណាតូ បាននិយាយកាលពីថ្ងៃអង្គារ (៣ កុម្ភៈ) ថា អង្គការណាតូ បានចាប់ផ្តើមរៀបចំផែនការយោធាសម្រាប់បេសកកម្មឆ្មាំសន្តិសុខអាកទិក ស្របភាពភាពតានតឹងរវាងសហរដ្ឋអាមេរិក និងសម្ព័ន្ធមិត្តអឺរ៉ុប លើបញ្ហាកោះហ្គ្រីនលែន។

ការលើកឡើងម្តងហើយម្តងទៀតរបស់លោកប្រធានាធិបតីអាមេរិក Donald Trump ដែលថាលោកចង់គ្រប់គ្រងកោះហ្គ្រីនលែន និងចោទសម្ព័ន្ធមិត្តអឺរ៉ុបថាបរាជ័យក្នុងការធានាសុវត្ថិភាពកោះអាកទិកដ៏ធំមួយនេះដែលជាដែនដីក្រៅប្រទេសរបស់ដាណឺម៉ាក បានបង្កឱ្យមានភាពតានតឹងជាមួយទីក្រុងកូប៉ិនហាក និងអង្គការណាតូទាំងមូល។

លោកវរសេនីយ៍ឯក Martin O'Donnell អ្នកនាំពាក្យនៃទីស្នាក់ការកំពូលរបស់សម្ព័ន្ធមិត្តអឺរ៉ុប បាននិយាយថា «ផែនការកំពុងដំណើរការសម្រាប់បង្កើនសកម្មភាពប្រុងប្រយ័ត្នរបស់អង្គការណាតូ ឈ្មោះថា បេសកកម្មឆ្មាំសន្តិសុខអាកទិក ឬ Arctic Sentry» ប៉ុន្តែលោកមិនលម្អិតបន្ថែមនោះទេ ដោយសារផែនការទើបតែចាប់ផ្តើមប៉ុណ្ណោះ។

បន្ទាប់ពីបានជួបជាមួយលោក Trump កាលពីខែមករា អគ្គលេខាធិការអង្គការណាតូ លោក Mark Rutte បាននិយាយថា មេដឹកនាំទាំងពីរបានពិភាក្សាអំពីមធ្យោបាយធ្វើការរួមគ្នារបស់សម្ព័ន្ធមិត្តអង្គការណាតូ ដើម្បីធានាសន្តិសុខអាកទិក មិនត្រឹមតែសម្រាប់កោះហ្រ្គីនលែនប៉ុណ្ណោះទេ ប៉ុន្តែសម្រាប់ប្រទេសណាតូទាំង៧ ដែលមានទឹកដីនៅតំបន់អាកទិកនេះ៕