សហរដ្ឋអាមេរិក បានបញ្ជូនកងទ័ពមួយក្រុមតូចទៅកាន់នីហ្សេរីយ៉ា នេះបើយោងតាមការលើកឡើងរបស់ឧត្តមសេនីយ៍ទទួលបន្ទុកបញ្ជាការអាមេរិកសម្រាប់ទ្វីបអាហ្វ្រិក កាលពីថ្ងៃអង្គារ (៣ កុម្ភៈ) ដែលជាការទទួលស្គាល់លើកដំបូងនៃកងកម្លាំងរបស់ខ្លួននៅទីនោះ ចាប់តាំងពីទីក្រុងវ៉ាស៊ីនតោន បានវាយប្រហារតាមអាកាសដ៏ធំនៅថ្ងៃបុណ្យណូអែល លើគោលដៅសកម្មប្រយុទ្ធ។

លោកប្រធានាធិបតី Donald Trump បានបញ្ជាឱ្យវាយប្រហារតាមអាកាសលើអ្វីដែលលោកពិពណ៌នាថា ជាគោលដៅរបស់ក្រុមរដ្ឋអ៊ិស្លាម (ISIS) នៅនីហ្សេរីយ៉ា កាលពីខែធ្នូ កន្លងទៅ ហើយបាននិយាយថា អាចមានសកម្មភាពយោធាអាមេរិក បន្ថែមទៀតនៅទីនោះ។ ទីភ្នាក់ងារសារព័ត៌មានរ៉យទ័រធ្លាប់រាយការណ៍ថា អាមេរិក បានធ្វើប្រតិបត្តិការហោះហើរស៊ើបការណ៍លើប្រទេសនេះ ចេញពីប្រទេសហ្គាណា ចាប់តាំងពីយ៉ាងហោចណាស់ចុងខែវិច្ឆិកាមក។

លោកឧត្តមសេនីយ៍ជាន់ខ្ពស់ Dagvin Anderson បាននិយាយថា ក្រុមនៃកងកម្លាំងអាមេរិក ត្រូវបានបញ្ជូនទៅនីហ្សេរីយ៉ា បន្ទាប់ពីប្រទេសទាំងពីរឯកភាពគ្នាថា ត្រូវធ្វើបន្ថែមទៀតដើម្បីប្រយុទ្ធប្រឆាំងនឹងការគំរាមកំហែងភេរវកម្មនៅអាហ្វ្រិកខាងលិច ប៉ុន្តែលោកមិនបានលម្អិតអំពីទំហំនិងវិសាលភាពនៃបេសកកម្មនេះទេ។ រដ្ឋមន្ត្រីក្រសួងការពារជាតិនីហ្សេរីយ៉ា Christopher Musa បានបញ្ជាក់ថា មានក្រុមមួយកំពុងធ្វើការក្នុងប្រទេសនេះ ប៉ុន្តែក៏មិនបានលម្អិតបន្ថែមដែរ។

អតីតមន្ត្រីអាមេរិកមួយរូបបាននិយាយថា ក្រុមរបស់អាមេរិកមួយនេះ ហាក់ដូចជាចូលរួមយ៉ាងសកម្មក្នុងការប្រមូលចារកម្មសម្ងាត់និងអនុញ្ញាតឱ្យកងកម្លាំងនីហ្សេរីយ៉ា វាយប្រហារក្រុមដែលមានទំនាក់ទំនងជាមួយពួកភេរវករ។ នីហ្សេរីយ៉ា បានស្ថិតក្រោមសម្ពាធយ៉ាងខ្លាំងពីទីក្រុងវ៉ាស៊ីនតោន ឱ្យចាត់វិធានការ បន្ទាប់ពីលោក Trump បានចោទប្រទេសអាហ្វ្រិកខាងលិចមួយនេះថាបានបរាជ័យ មិនអាចការពារគ្រិស្តសាសនិកពីការធ្វើទុក្ខបុកម្នេញរបស់ពួកសកម្មប្រយុទ្ធអ៊ិស្លាមនិយម ដែលកំពុងប្រតិបត្តិការនៅភាគពាយព្យនៃប្រទេសនោះ៕