រដ្ឋបាលរដ្ឋ Alagoas និយាយថា មនុស្សយ៉ាងហោច ១៥នាក់ បានស្លាប់ ក្រោយរថយន្តក្រុងដឹកក្រុមធម្មយាត្រា បានក្រឡាប់កាលពីព្រឹកថ្ងៃអង្គារក្នុងទីក្រុង Sao Jose da Tapera ស្ថិតនៅភាគឦសានប្រទេសប្រេស៊ីល ។

ក្រុមអាជ្ញាធរអះអាងថា រថយន្តក្រុងមួយគ្រឿងនេះ ដឹកអ្នកដំណើរ ៦០នាក់ ខណៈសារព័ត៌មានក្នុងស្រុករាយការណ៍ថា អ្នកស្លាប់រួមមានបុរស ៥នាក់ ស្រ្តី ៧នាក់ និងក្មេង ៣នាក់ ។

ពួកគេមានជំនឿថា អ្នកបើកបររថយន្តក្រុង បានបាត់បង់ម្ចាស់ការលើខ្លួនឯង មុនពេលរថយន្តធ្លាក់ពីលើផ្លូវហាយវ៉េ និងក្រឡាប់ជាច្រើនត្រឡប់ ហើយអ្នករងរបួសធ្ងន់ធ្ងរបំផុតដែលត្រូវបានបញ្ជូនទៅកាន់មន្ទីរពេទ្យ គឺជាកុមារអាយុ ៩ឆ្នាំម្នាក់ ដែលមានរបួសក្បាល ។

យោងតាមសេចក្តីរាយការណ៍បានឲ្យដឹងថា អ្នករួសរានត្រូវបានជួយសង្រ្គោះចេញពីបំណែករថយន្តក្រុង ហើយនិងត្រូវបានបញ្ជូនទៅកាន់មន្ទីរពេទ្យនៅទូទាំងតំបន់ ។

ជនរងគ្រោះទាំងនេះ បានវិលត្រឡប់ទៅកាន់រដ្ឋ Alagoasវិញ ក្រោយធ្វើធម្មយាត្រាទៅកាន់ពិធីបុណ្យសាសនា Our Lady of Candeiasស្ថិតនៅទីក្រុង Juazeiro do Norte ៕