មន្ត្រីយោធាអាមេរិក បាននិយាយកាលពីថ្ងៃអង្គារថា នាវាចម្បាំងរបស់ទីក្រុងវ៉ាស៊ីនតោន បានទៅដល់ឆ្នេរសមុទ្រហៃទី ខណៈដែលមេដឹកនាំប្រទេសកោះនេះ កំពុងប្រឹងប្រែងក្នុងការបន្តសង្គ្រាមប្រឆាំងនឹងក្រុមឧក្រិដ្ឋជនគ្រឿងញៀនដ៏ហិង្សា។

ស្ថានទូតអាមេរិកប្រចាំប្រទេសហៃទី បានបង្ហោះនៅលើប្រព័ន្ធផ្សព្វផ្សាយសង្គម X ថា នាវាចម្បាំង USS Stockdale, USCGC Stone និង USCGC Diligence បានចូលទៅក្នុងឈូងសមុទ្រព័រអូប្រាំង ( Port-au-Prince) ដើម្បី«បង្ហាញពីការប្តេជ្ញាចិត្តដ៏រឹងមាំរបស់សហរដ្ឋអាមេរិកចំពោះសន្តិសុខ ស្ថិរភាព និងអនាគតដ៏ភ្លឺស្វាងរបស់ប្រទេសហៃទី»។

សេចក្តីថ្លែងការណ៍នេះ បានឲ្យដឹងថា កងនាវានេះ ត្រូវបានបញ្ជូន «តាមទិសដៅរបស់រដ្ឋមន្ត្រីក្រសួង    សង្គ្រាម» លោក Pete Hegseth ជាផ្នែកមួយនៃ «ប្រតិបត្តិការ Southern Spear» ដោយសំដៅទៅលើយុទ្ធនាការយោធាអាមេរិកដែលកំណត់គោលដៅលើក្រុមជួញដូរគ្រឿងញៀន ដែលត្រូវបានសង្ស័យនៅក្នុងតំបន់ការ៉ាអ៊ីប និងប៉ាស៊ីហ្វិកភាគខាងកើត ដែលបានសម្លាប់មនុស្សជាង ១០០នាក់ នៅក្នុងការវាយប្រហារទៅលើទូក។

បន្ទាប់ពីប្រឈមនឹងអំពើហិង្សា និងអស្ថិរភាពអស់រយៈពេលជាច្រើនឆ្នាំ ប្រទេសហៃទីកំពុងចូលដល់ដំណាក់កាលថ្មីនៃភាពចលាចលនយោបាយក្នុងរយៈពេលប៉ុន្មានថ្ងៃ មុនពេលបញ្ចប់អាណត្តិជាផ្លូវការសម្រាប់ក្រុមប្រឹក្សាអន្តរកាលប្រធានាធិបតីរបស់ប្រទេសនេះ នៅថ្ងៃទី ០៧ ខែកុម្ភៈ។

អំពើហិង្សាដែលបង្កឡើងដោយក្រុមជនអន្ធពាលបានបង្ខំឲ្យនាយករដ្ឋមន្ត្រីមុន គឺលោក Ariel Henry លាលែងពីតំណែងនៅឆ្នាំ ២០២៤ ហើយប្រទេសនេះ មិនបានរៀបចំការបោះឆ្នោត ចាប់តាំងពីឆ្នាំ ២០១៦ ដោយអាជ្ញាធររដ្ឋាភិបាលដួលរលំនៅក្នុងតំបន់ភាគច្រើននៃប្រទេសនេះ ដែលនាំឲ្យមានវិបត្តិសន្តិសុខ សុខភាព និងសេដ្ឋកិច្ច កើតឡើងក្នុងពេលជាមួយគ្នា៕