ប្រព័ន្ធផ្សព្វផ្សាយក្នុងស្រុក នៅថ្ងៃពុធ (ទី៤ ខែកុម្ភៈ ឆ្នាំ២០២៦) នេះ បានរាយការណ៍ថា ស្ត្រីនៅក្នុងប្រទេសអ៊ីរ៉ង់ ឥឡូវនេះអាចទទួលបានបណ្ណបើកបរម៉ូតូជាផ្លូវការហើយ ដោយការសម្រេចនេះបានបញ្ចប់ភាពមិនច្បាស់លាស់ផ្នែកច្បាប់រយៈពេលជាច្រើនឆ្នាំ ជុំវិញយានយន្តកង់ ២។

ច្បាប់ពីមុន មិនបានហាមឃាត់ស្ត្រីមិនឲ្យជិះម៉ូតូ និងស្កូទ័រច្បាស់លាស់ឡើយ ប៉ុន្តែនៅក្នុងការអនុវត្តជាក់ស្តែង អាជ្ញាធរបានបដិសេធមិនចេញបណ្ណបើកបរឲ្យ។ ដោយសារតែភាពមិនច្បាស់លាស់ផ្នែកច្បាប់នេះ ស្ត្រីត្រូវបានឲ្យទទួលខុសត្រូវផ្នែកច្បាប់ ចំពោះគ្រោះថ្នាក់ចរាចរណ៍ បើទោះបីជាខ្លួនគឺជាជនរងគ្រោះក្ដី។

ទីភ្នាក់ងារសារព័ត៌មាន Ilna របស់ប្រទេសនេះ បានរាយការណ៍ថា អនុប្រធានាធិបតីទី១ របស់ប្រទេសអ៊ីរ៉ង់ លោក Mohammad Reza Aref បានចុះហត្ថលេខាលើសេចក្តីសម្រេចមួយ កាលពីថ្ងៃអង្គារ ដែលមានគោលបំណងបញ្ជាក់អំពីច្បាប់ចរាចរណ៍ ដែលត្រូវបានអនុម័តដោយគណៈរដ្ឋមន្ត្រីអ៊ីរ៉ង់ កាលពីចុងខែមករា។

សារព័ត៌មាន Ilna បានបន្ថែមថា សេចក្តីសម្រេចនេះតម្រូវឲ្យនគរបាលចរាចរណ៍ «ផ្តល់ការបណ្តុះបណ្តាលជាក់ស្តែងដល់អ្នកដាក់ពាក្យជាស្ត្រី រៀបចំការប្រឡងក្រោមការត្រួតពិនិត្យដោយផ្ទាល់របស់នគរបាល និងចេញបណ្ណបើកបរម៉ូតូដល់ស្ត្រី»។

ចំណាត់ការនេះកើតឡើងបន្ទាប់ពីមានការតវ៉ាបន្តបន្ទាប់ នៅទូទាំងប្រទេសអ៊ីរ៉ង់ ដែលដំបូងឡើយត្រូវបានបង្កឡើងដោយការមិនសប្បាយចិត្តផ្នែកសេដ្ឋកិច្ច ប៉ុន្តែវាបានរីករាលដល់កាលពីខែមុនទៅជាបាតុកម្មប្រឆាំងរដ្ឋាភិបាលទូទាំងប្រទេស៕