គណៈកម្មការធ្វើជំរឿនមន្រ្តីក្រសួងមុខងារសាធារណៈ បានរៀបចំវគ្គបណ្តុះបណ្តាលចែករំលែកបទពិសោធនៃការធ្វើជំរឿនមន្រ្តីជូនដល់ ថ្នាក់ដឹកនាំ និងមន្រ្តីបច្ចេកទេសទីស្តីការគណៈរដ្ឋមន្រ្តី។ វគ្គបណ្តុះបណ្តាលប្រព្រឹត្តទៅក្រោមសហអធិបតីភាព លោកជំទាវ ឈី វិជ្ជរ៉ា រដ្ឋលេខាធិការក្រសួងមុខងារសាធារណៈ តំណាងដ៏ខ្ពង់ខ្ពស់ ឯកឧត្តម ហ៊ុន ម៉ានី ឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ និង ឯកឧត្តមបណ្ឌិតសភាចារ្យ ហ៊ីង ថូរ៉ាក់ស៊ី រដ្ឋលេខាធិការប្រចាំការទីស្តីការគណៈរដ្ឋមន្រ្តី។

ថ្លែងមតិស្វាគមន៍វគ្គបណ្តុះបណ្តាល លោកជំទាវរដ្ឋលេខាធិការ ឈី វិជ្ជរ៉ា បានចែករំលែកពីសមិទ្ធផលការងារសម្រេចបានសំខាន់ៗដែលក្រសួងមុខងារសាធារណៈក្នុងនាមជាសេនាធិការរាជរដ្ឋាភិបាលនីតិកាលទី៧ បានដឹកនាំអនុវត្តកិច្ចការកែទម្រង់រដ្ឋបាលសាធារណៈ ពោលគឺការអនុវត្តវិធានការគន្លឹះទាំង៣ ព្រមទាំងទិសដៅការងារដែលនឹងត្រូវអនុវត្តជាបន្តបន្ទាប់។ លោកជំទាវ បានថ្លែងថាវគ្គបណ្តុះបណ្តាលការងារធ្វើជំរឿននាពេលនេះ ជាផ្នែកមួយនៃការអនុវត្តវិធានការគន្លឹះទី២ ជាលទ្ធផលក្រោយពីបានធ្វើការវិភាគមុខងារតាមក្រសួង ស្ថាប័នបានបញ្ចប់ ហើយនៅក្នុងការអនុវត្តគឺត្រូវការសហការចូលរួមពីគ្រប់ក្រសួង ស្ថាប័នចំណុះអង្គការនីតិប្រតិបត្តិ ហើយគោលបំណងនៃការធ្វើជំរឿនមន្រ្តីគឺដើម្បី ទទួលបានទិន្នន័យច្បាស់លាស់ ឯកភាពគ្នា និងប្រើប្រាស់បានរួមគ្នា។

វគ្គបណ្តុះបណ្តាលនេះ បានផ្តល់ជូនថ្នាក់ដឹកនាំ និងមន្រ្តីបច្ចេកទេសទាំងអស់ពីដំណើរការប្រតិបត្តិការ និងការប្រើប្រាស់ប្រព័ន្ធធ្វើជំរឿនមន្រ្តី តាមរយៈបទបង្ហាញរបស់វាគ្មិនក្រុមការងារបច្ចេកទេសនៃគណៈកម្មការធ្វើជំរឿនមន្រ្តីក្រសួងមុខងារសាធារណៈ រួមទាំងការអនុវត្តសាកល្បងដោយផ្ទាល់ទៅលើការប្រើប្រាស់ប្រព័ន្ធគ្រប់គ្រងជំរឿនមន្រ្តីថ្នាក់ជាតិ ដើម្បីជំរុញនិងធានាដល់ដំណើរការនៃការធ្វើជំរឿនមន្ត្រីជាក់ស្តែងប្រកបដោយភាពរលូន ឆាប់រហ័ស ច្បាស់លាស់ និងមានប្រសិទ្ធភាព។

សូមជម្រាបថា វគ្គបណ្តុះបណ្តាលនេះប្រព្រឹត្តទៅមានរយៈពេលពេញ១ថ្ងៃ នាថ្ងៃទី៤ ខែកុម្ភៈ ឆ្នាំ២០២៦ នៅទីស្តីការគណៈរដ្ឋមន្រ្តី ដោយមានការអញ្ជើញចូលរួមពី ក្រុមការងារគណៈកម្មការធ្វើជំរឿនមន្រ្តីក្រសួងមុខងារសាធារណៈ ថ្នាក់ដឹកនាំ និងមន្រ្តីបច្ចេកទេសទីស្តីការគណៈរដ្ឋមន្រ្តី ប្រមាណ ១០០នាក់។