មេដឹកនាំកោះតៃវ៉ាន់ លោក Lai Ching-te បាននិយាយនៅថ្ងៃព្រហស្បតិ៍ (៥ កុម្ភៈ) នេះថា ទំនាក់ទំនងរវាងកោះនេះជាមួយសហរដ្ឋអាមេរិក គឺ «រឹងមាំដូចថ្ម» ហើយកម្មវិធីសហប្រតិបត្តិការនឹងនៅតែបន្ត និងមិនផ្លាស់ប្តូរឡើយ បន្ទាប់ពីប្រធានាធិបតីចិន លោក Xi Jinping បានពិភាក្សាអំពីកោះស្វ័យគ្រប់គ្រងនេះ ក្នុងជំនួបតាមទូរសព្ទជាមួយលោកប្រធានាធិបតីអាមេរិក Donald Trump។

នៅក្នុងកិច្ចសន្ទនាកាលពីថ្ងៃពុធ លោក Xi បានប្រាប់លោក Trump ថា សហរដ្ឋអាមេរិក គួរតែដោះស្រាយ «ដោយប្រយ័ត្នប្រយែង» លើការលក់សព្វាវុធឱ្យកោះដែលទីក្រុងប៉េកាំង ចាត់ទុកថាជាទឹកដីរបស់ខ្លួនមួយនេះ។ កាលពីខែធ្នូកន្លងទៅ រដ្ឋបាលលោក Trump បានប្រកាសលក់អាវុធតម្លៃ ១១,១ ពាន់លានដុល្លារ ឱ្យកោះតៃវ៉ាន់ ដែលជាកញ្ចប់អាវុធដ៏ធំបំផុតមិនធ្លាប់មានរបស់អាមេរិកសម្រាប់កោះនេះ ដែលបានធ្វើឱ្យចិន មិនពេញចិត្តជាខ្លាំង។

លោក Trump បានសរសេរលើបណ្ដាញសង្គមថា ជំនួបទូរសព្ទនេះគឺ «វិជ្ជមានខ្លាំងណាស់» ហើយថា ទំនាក់ទំនងរបស់លោកជាមួយលោក Xi គឺ «ល្អយ៉ាងខ្លាំង»។ កិច្ចសន្ទនានេះកើតឡើងប៉ុន្មានម៉ោងប៉ុណ្ណោះ បន្ទាប់ពីកិច្ចប្រជុំតាមអ៊ីនធឺណិតរវាងលោក Xi ជាមួយប្រធានាធិបតីរុស្ស៊ី Vladimir Putin។

ថ្លែងទៅកាន់អ្នកយកព័ត៌មាននៅកណ្តាលកោះតៃវ៉ាន់ លោក Lai បាននិយាយថា កោះតៃវ៉ាន់ និងអាមេរិក មានបណ្តាញទំនាក់ទំនងដ៏រឹងមាំ។ លោកបន្តថា «ទំនាក់ទំនងរវាងកោះតៃវ៉ាន់ និងសហរដ្ឋអាមេរិកគឺរឹងមាំដូចជាថ្ម ហើយកម្មវិធីសហប្រតិបត្តិការទាំងអស់នឹងបន្ត ហើយនឹងមិនផ្លាស់ប្តូរឡើយ» ដោយបន្ថែមថា ការប្តេជ្ញាចិត្តរបស់អាមេរិក ចំពោះកោះតៃវ៉ាន់ ក៏នៅតែមិនផ្លាស់ប្តូរដែរ៕