អាជ្ញាធរអូស្ត្រាលី នៅថ្ងៃព្រហស្បតិ៍ (៥ កុម្ភៈ) បានប្រកាសចាត់ទុកថាជាឧប្បត្តិហេតុភេរវកម្ម ចំពោះការប៉ុនប៉ងបំផ្ទុះគ្រាប់បែកមួយករណី ក្នុងការជួបជុំតវ៉ាប្រឆាំងនឹងទិវាជាតិរបស់អូស្ត្រាលី កាលពីថ្ងៃទី២៦ ខែមករា កន្លងទៅ ដែលជាបទចោទប្រកាន់លើកដំបូងបំផុតនៅក្នុងរដ្ឋ Western Australia។

គួរឱ្យដឹងថា កាលពីខែមករា ក្រុមមន្រ្តីចាប់ខ្លួនបុរសវ័យ ៣១ឆ្នាំម្នាក់ ក្រោមការចោទប្រកាន់ថា បុរសរូបនោះបានគប់គ្រាប់បែកផលិតដោយខ្លួនឯង ចូលក្នុងហ្វូងមនុស្សរាប់ពាន់នាក់នៅទីក្រុង Perth ដែលកំពុងធ្វើបាតុកម្មក្នុងទិវាអូស្រ្តាលី។ ពុំមាននរណាម្នាក់រងរបួសនោះទេ ព្រោះគ្រាប់បែកមិនបានផ្ទុះ។

មេដឹកនាំរដ្ឋ លោក Roger Cook បាននិយាយថា បុរសនោះមានទស្សនៈជ្រុលនិយមខាងពូជសាសន៍ ហើយការវាយប្រហារនេះគឺជាការប៉ុនប៉ងដាក់គោលដៅលើក្រុមជនជាតិដើមភាគតិចរបស់អូស្ត្រាលី។

លោក Cook បានប្រាប់សន្និសីទសារព័ត៌មានថា «ការចោទប្រកាន់នេះអះអាងថា ការវាយប្រហារលើជនជាតិដើមភាគតិច និងអ្នកតវ៉ាដោយសន្តិវិធីផ្សេងទៀត ត្រូវបានជំរុញដោយមនោគមវិជ្ជាស្អប់ខ្ពើម និងរើសអើងជាតិសាសន៍»។ ប្រសិនបើត្រូវបានបញ្ជាក់ បទចោទនេះនឹងមានទោសជាប់ពន្ធនាគារអតិបរមាអស់មួយជីវិត។

អូស្ត្រាលី មានទាំងជនជាតិដើមភាគតិចដែលជាប្រជាជាតិដើមនៃទ្វីបនេះ និងប្រជាជនដែលគេហៅថា «ពលរដ្ឋថ្មី» ដែលជាកូនចៅរបស់អ្នកតាំងលំនៅអឺរ៉ុបនិងជនអន្តោប្រវេសន៍ក្រោយមក ដោយសារតែអាណានិគមនិយមរបស់អង់គ្លេសឆ្នាំ១៧៨៨។ ទិវាអូស្ត្រាលីគឺជាទិវារំលឹកដល់អាណានិគមអង់គ្លេស ដែលជាការអបអរសប្បាយរបស់ពលរដ្ឋថ្មី ប៉ុន្តែបានទាក់ទាញការរិះគន់ពីសហគមន៍ជនជាតិដើមភាគតិច ព្រោះនេះជាថ្ងៃតែមួយទៅនឹងការជួបជុំតវ៉ាក្នុង «ទិវាឈ្លានពាន» នៅទូទាំងប្រទេស៕