ប្រធានាធិបតីប៉ាណាម៉ាលោក Jose Raul Mulino បានច្រានចោលការគំរាមកំហែងរបស់ចិនថាប្រទេសនៅអាមេរិកកណ្តាលមួយនេះ នឹងប្រឈមផលវិបាកធ្ងន់ធ្ងរ ក្រោយក្រុមហ៊ុនហុងកុង ត្រូវបានគេបណ្តេញចេញពីកំពង់ ២កន្លែងនៅព្រែកជីកយុទ្ធសាស្រ្តប៉ាណាម៉ា ស្របពេលមានសម្ពាធពីប្រធានាធិបតីសហរដ្ឋអាមេរិកលោក Donald Trump ។

ក្នុងសារបង្ហោះលើបណ្តាញព័ត៌មានសង្គមកាលពីថ្ងៃពុធ លោក Mulino បាននិយាយថា លោកសូមធ្វើការបដិសេធន៍ចោលទាំងស្រុង ចំពោះការគំរាមកំហែងរបស់រដ្ឋាភិបាលចិនប្រឆាំងនឹងប្រទេសរបស់លោក ក្រោយតុលាការកំពូលប៉ាណាម៉ា សម្រេចឲ្យអស់សុពលភាពកិច្ចសន្យាដែលអនុញ្ញាតឲ្យក្រុមហ៊ុន CK Hutchison មានមូលដ្ឋាននៅទីក្រុងហុងកុង ប្រតិបត្តិការកំពង់ផែ ២កន្លែង នៅលើព្រែកជីកប៉ាណាម៉ា ។

នៅក្នុងសារបង្ហោះនោះ លោក Mulino និយាយយ៉ាងទទួចថា ប៉ាណាម៉ា គឺជាប្រទេសដែលគោរពច្បាប់ និងគោរពការសម្រេចចិត្តរបស់តុលាការ ដែលជាស្ថាប័នឯករាជរបស់រដ្ឋាភិបាលកណ្តាល ។

ទោះបីជាយ៉ាងណាក៏ដោយ ការិយាល័យកិច្ចការហុងកុង និងម៉ាកាវរបស់ចិន បានហៅសេចក្ដីសម្រេចរបស់តុលាការកំពូលប៉ាណាម៉ាថា មិនសមហេតុផល និងគួរឲ្យអាម៉ាស់ ហើយប្ដេជ្ញាការពារផលប្រយោជន៍របស់ក្រុមហ៊ុនចិន ។

ពួកគេបន្តថា សេចក្តីសម្រេចនេះមិនអើពើនឹងការពិត រំលោភលើទំនុកចិត្ត និងប៉ះពាល់យ៉ាងធ្ងន់ធ្ងរដល់សិទ្ធិ និងផលប្រយោជន៍ស្របច្បាប់របស់សហគ្រាសនៅទីក្រុងហុងកុង។ ចិនមានមធ្យោបាយ ឧបករណ៍ ព្រមទាំងកម្លាំង និងសមត្ថភាពគ្រប់គ្រាន់ ដើម្បីការពារសណ្តាប់ធ្នាប់សេដ្ឋកិច្ច និងពាណិជ្ជកម្មអន្តរជាតិដ៏យុត្តិធម៌ និងត្រឹមត្រូវ ៕