សមាជិកព្រឹទ្ធសភាអាមេរិកមកពីគណបក្សប្រជាធិបតេយ្យ នៅថ្ងៃព្រហស្បតិ៍ (ទី៥ ខែកុម្ភៈ ឆ្នាំ២០២៦) នេះ បានជំរុញឲ្យមន្ទីរបញ្ចកោណធ្វើការពិនិត្យឡើងវិញជាបន្ទាន់លើ SpaceX ស្របពេលមានការចោទប្រកាន់ថា វិនិយោគិនចិនបានទិញភាគហ៊ុនដោយសម្ងាត់ នៅក្នុងក្រុមហ៊ុនឯកជនផលិតរ៉ូកែតមួយនេះ ដោយលើកឡើងពីហានិភ័យសន្តិសុខជាតិដែលអាចកើតមាន។ នេះបើយោងតាមលិខិតមួយដែលសារព័ត៌មាន Reuters បានឃើញ។

សមាជិកព្រឹទ្ធសភា លោកស្រី Elizabeth Warren និងលោក Andy Kim បានសរសេរទៅកាន់រដ្ឋមន្ត្រីក្រសួងការពារជាតិ លោក Pete Hegseth ដោយសម្ដែងនូវក្ដីបារម្ភថា ការវិនិយោគរបស់ចិន នៅក្នុងក្រុមហ៊ុន SpaceX អាចបង្ហាញពី «ការគំរាមកំហែងសន្តិសុខជាតិ ដែលអាចធ្វើឲ្យប៉ះពាល់ដល់ហេដ្ឋារចនាសម្ព័ន្ធយោធា ចារកម្ម និងស៊ីវិលសំខាន់ៗ»។

សមាជិកសភា បានលើកឡើងពីរបាយការណ៍ពីប្រព័ន្ធផ្សព្វផ្សាយ និងសក្ខីកម្មរបស់តុលាការ ដែលបង្ហាញថា វិនិយោគិនដែលមានទំនាក់ទំនងជាមួយចិន បានបញ្ជូនមូលនិធិតាមរយៈអង្គភាព នៅកោះ Cayman និងកោះ British Virgin របស់ប្រទេសអង់គ្លេស ដើម្បីបិទបាំងការទិញភាគហ៊ុន ក្នុងក្រុមហ៊ុន SpaceX នេះ។

ដោយត្រូវបានបង្កើតឡើងដោយលោក Elon Musk ដែលជាបុគ្គលមានទ្រព្យសម្បត្តិច្រើនបំផុតរបស់ពិភពលោក ក្រុមហ៊ុន SpaceX ដើរតួនាទីយ៉ាងសំខាន់នៅក្នុងហេដ្ឋារចនាសម្ព័ន្ធសន្តិសុខជាតិរបស់សហរដ្ឋអាមេរិក ដោយបាញ់បង្ហោះផ្កាយរណបយោធា និងចារកម្ម និងដំណើរការបណ្តាញទំនាក់ទំនង Starlink របស់ខ្លួន ដែលត្រូវបានប្រើប្រាស់ដោយមន្ទីរបញ្ចកោណ និងដែលគាំទ្រដល់ការការពារជាតិអ៊ុយក្រែន៕