ប្រធានសិទ្ធិមនុស្សរបស់អង្គការសហប្រជាជាតិ បាននិយាយថា ការិយាល័យរបស់លោកត្រូវបានជំរុញចូលទៅក្នុង «របៀបរស់រាន» ខណៈលោកបានអំពាវនាវរកមូលនិធីចំនួន៤០០លានដុល្លារដើម្បីគ្រប់គ្រងតម្រូវការមូលនិធិរបស់ខ្លួននៅឆ្នាំនេះ។ លោក Volker Turk ឧត្តមស្នងការសិទ្ធិមនុស្សអង្គការសហប្រជាជាតិ បាននិយាយកាលពីថ្ងៃព្រហស្បតិ៍ថា ការកាត់ថវិកាកាលពីឆ្នាំមុន បានកាត់បន្ថយប្រតិបត្តិការនៅក្នុងប្រទេសចំនួន១៧ រួមមានទាំងប្រទេសកូឡុំប៊ី សហភាពមីយ៉ាន់ម៉ា និងប្រទេសឆាដ។

លោក Turk បានព្រមានថាការកាត់បន្ថយទាំងនេះកំពុងធ្វើឱ្យអន្តរាយដល់ការតាមដានសិទ្ធិមនុស្សសកល ខណៈលោកបានបញ្ជាក់ពីតម្រូវការមូលនិធិរបស់ទីភ្នាក់ងាររបស់លោកបន្ទាប់ពីសហរដ្ឋអាមេរិក និងអ្នកផ្តល់ជំនួយសំខាន់ៗរបស់ប្រទេសលោកខាងលិចផ្សេងទៀតកាលពីឆ្នាំមុន បានកាត់ការចំណាយផ្នែកមនុស្សធម៌ និងការគាំទ្ររបស់ពួកគេសម្រាប់ទីភ្នាក់ងារដែលមានទំនាក់ទំនងជាមួយអង្គការសហប្រជាជាតិ។ «ដោយសារតែវិបត្តិកំពុងកើនឡើង យើងមិនអាចមានលទ្ធភាពគ្រប់គ្រាន់សម្រាប់ប្រព័ន្ធសិទ្ធិមនុស្សដែលកំពុងស្ថិតក្នុងវិបត្តិនោះទេ»។ ខណៈរដ្ឋាភិបាលសហរដ្ឋអាមេរិកក្រោមការដឹកនាំរបស់អតីតប្រធានាធិបតី លោក Joe Biden គឺជាម្ចាស់ជំនួយធំបំផុតតែមួយគត់ដល់ទីភ្នាក់ងាររបស់របស់លោកTurk ក្នុងការរួមចំណែកដោយស្ម័គ្រចិត្តចំនួន៣៦លានដុល្លារក្នុងឆ្នាំ ២០២៤ ដែលរដ្ឋបាលបច្ចុប្បន្នក្រោមការដឹកនាំរបស់ប្រធានាធិបតី លោក Donald Trump បានបញ្ឈប់ការចូលរួមចំណែករបស់ខ្លួននៅឆ្នាំ ២០២៥។

លោក Trump បាននិយាយដដែលៗថា អង្គការសហប្រជាជាតិមានសក្តានុពល ប៉ុន្តែមិនបានបំពេញតាមសក្តានុពលរបស់ខ្លួននោះទេ។ ក្នុងអំឡុងពេលកាន់តំណែងរបស់លោក សហរដ្ឋអាមេរិកបានដកខ្លួនចេញពីស្ថាប័នអង្គការសហប្រជាជាតិដូចជាអង្គការសុខភាពពិភពលោក និងអង្គការយូណេស្កូ និងបានកាត់មូលនិធិដល់ទីភ្នាក់ងាររាប់សិបផ្សេងទៀត។