លោកប្រធានាធិបតី Miguel Diaz-Canel បានទទូចកាលពីថ្ងៃព្រហស្បតិ៍ បន្ទាប់ពីការគំរាមកំហែងជាច្រើនខែពីប្រធានាធិបតីអាមេរិក លោក ដូណាល់ ត្រាំ (Donald Trump) ថា គុយបាត្រៀមខ្លួនរួចជាស្រេច ដើម្បីធ្វើការសន្ទនាជាមួយសហរដ្ឋអាមេរិក ប៉ុន្តែមិនស្ថិតនៅក្រោមសម្ពាធនោះទេ។

លោក Diaz-Canel បានថ្លែងនៅក្នុងសុន្ទរកថាមួយទៅកាន់ប្រជាជាតិតាមទូរទស្សន៍ និងវិទ្យុរដ្ឋថា៖«គុយបាមានឆន្ទៈក្នុងការចូលរួមក្នុងការសន្ទនាជាមួយសហរដ្ឋអាមេរិក ដែលជាការសន្ទនាអំពីប្រធានបទណាមួយ...ប៉ុន្តែដោយគ្មានសម្ពាធ ឬបុរេលក្ខខណ្ឌទេ»។

លោកបានបន្ថែមថា ការសន្ទនាណាមួយ ត្រូវតែធ្វើឡើង «ពីជំហរស្មើភាពគ្នា ដោយគោរពអធិបតេយ្យភាព ឯករាជ្យភាព និងការសម្រេចចិត្តដោយខ្លួនឯងរបស់យើង» និងដោយគ្មាន «ការជ្រៀតជ្រែកក្នុងកិច្ចការផ្ទៃក្នុងរបស់យើង»។

លោក ត្រាំ បានធ្វើការគំរាមកំហែងម្តងហើយម្តងទៀតប្រឆាំងនឹងប្រទេសគុយបាដែលគ្រប់គ្រងដោយកុម្មុយនិស្ត ក្នុងរយៈពេលប៉ុន្មានខែថ្មីៗនេះ ដោយសន្យាថា នឹងកាត់ផ្តាច់លទ្ធភាពទទួលបានប្រេងរបស់ខ្លួន និងបញ្ជាក់ថា ប្រទេសកោះនេះ «ត្រៀមខ្លួនរួចជាស្រេច ដើម្បីដួលរលំ»។

ប្រទេសគុយបា ដែលស្ថិតក្នុងវិបត្តិសេដ្ឋកិច្ច បានពឹងផ្អែកលើការផ្គត់ផ្គង់ប្រេងពីប្រទេសវ៉េណេស៊ុយអេឡាជាយូរមកហើយ ដែលមេដឹកនាំរបស់ខ្លួន ត្រូវបានបណ្តេញចេញនៅក្នុងប្រតិបត្តិការយោធាដ៏សាហាវរបស់សហរដ្ឋអាមេរិក កាលពីខែមុន។

ក្រោយមក លោក ត្រាំ ដែលបានអះអាងថា ខ្លួនគ្រប់គ្រងប្រេងរបស់ប្រទេសវ៉េណេស៊ុយអេឡា បានបេ្តជ្ញា នឹងផ្តាច់ការផ្គត់ផ្គង់ប្រេងដល់គុយបា និងបានគំរាមដាក់ពន្ធគយលើប្រទេសដទៃទៀត ដែលហ៊ានចូលជួយទីក្រុងឡាហាវ៉ាន ដែលរងការដាក់ទណ្ឌកម្មដោយសហរដ្ឋអាមេរិកនោះ៕