​បាល់ទាត់៖ ក្រុម​ហង្ស​ក្រហម Liverpool បាន​បន្ត​ដាក់​សំពាធ​លើ​ក្រុម​កំពូល​តារាង Manchester City ដោយ​ដេញ​ពីក្រោយ​តែ ១ពិន្ទុ​ប៉ុណ្ណោះ​ក្រោយ​យកឈ្នះ​នៅ​ទឹកដី Arsenal ២-០ យប់មិញ​។

​​Arsenal ដែល​កំពុងមាន​ទំរង់​លេង​ល្អ និង​កំពុង​ប្រយុទ្ធ​ដើម្បី​តំណែង Top4 របស់ខ្លួន​នោះ​មិនអាច​ទប់​ជាប់​ឡើយ បន្ទាប់ពី​ខ្សែប្រយុទ្ធ​ព័រទុយហ្កាល់ Diogo Jota រក​គ្រាប់​នាំមុខ​បានសំរេច​នៅ​នាទី​ទី ៥៤ មុន​ពេលដែល​ខ្សែប្រយុទ្ធ​ប្រេ​ស៊ី​ល Roberto Firmino ធានា​ជ័យជំនះ​នៅ​នាទី​ទី ៦២​។ ​​នេះ​ជា​ជ័យជំនះ ៩ប្រកួត​ជាប់​គ្នា​ហើយ​សំរាប់ Liverpool នៅ Premier League ដែល​នៅពេលនេះ​ក្រុម​របស់លោក Jurgen Klopp ដេញ​ពីក្រោយ Manchester City តែ ១ពិន្ទុប៉ុណ្ណោះ​ក្រោយ​លេង​បាន ២៩ ប្រកួត​ដូចគ្នា​។ ​​ចំណែក Arsenal នៅតែ​បន្ត​ឈរ​លេខ ៤ ដដែល​ពីលើ​ក្រុម​លេខ ៥ Manchester United ១ពិន្ទុ​ហើយ​ក្រុម​របស់លោក Mikel Arteta នៅសល់ ២ ប្រកួត​ក្នុង​ដៃ​ទៀត​។

​​ដោយឡែក​មួយគូ​ទៀត​យប់មិញ​ផងដែរ Tottenham Hotspur ធ្វើដំណើរ​ទៅយក​បី​ពិន្ទុ​ពី​ទឹកដី Brighton​។ ​​ខ្សែការពារ Cristian Romero បើក​ការ​នាំមុខ​ឱ្យ Spurs នៅ​នាទី​ទី ៣៧ ខណៈ​វគ្គ​ទី ២ ខ្សែប្រយុទ្ធ​អង់គ្លេស Harry Kane ធានាជ័យជំនះ​នៅ​នាទី​ទី ៥៧ ដែលជា​គ្រាប់​ទី ៧ របស់គេ​ក្នុង ៦ ប្រកួត​ចុងក្រោយ​។ ​បី​ពិន្ទុ​នេះ​ធ្វើឱ្យ Spurs បន្ត​ក្តីសង្ឃឹម​ដណ្តើម​តំណែង Top4 ផងដែរ​ដោយ​កំពុង​ឈរ​លេខ ៧ មាន ៤៨ ពិន្ទុ​ដេញ​ពីក្រោយ​ក្រុម​លេខ ៤ Arsenal ៣ពិន្ទុ​៕

​អត្ថបទ​៖​នាង សុភា​វុ​ធ