ផែនការចំណាយលើវិស័យការពារជាតិដ៏ធំ ៤០ពាន់លានដុល្លាររបស់មេដឹកានាំកោះតៃវ៉ាន់ លោក Lai Ching-te ត្រូវបានជាប់គាំងផ្នែកនយោបាយ ខណៈដែលសមាជិកសភារបស់គណបក្សប្រឆាំង បដិសេធមិនពិចារណាលើសំណើនេះ ដោយគ្មានសម្បទានពីរដ្ឋាភិបាល ជាការសម្រេចដែលបង្កឲ្យមានការរិះគន់នៅទីក្រុងវ៉ាស៊ីនតោន។

កោះតៃវ៉ាន់បានចំណាយប្រាក់រាប់ពាន់លានដុល្លារ ដើម្បីធ្វើឲ្យវិស័យយោធារបស់ខ្លួនប្រសើរឡើង ក្នុងរយៈពេលមួយទសវត្សរ៍កន្លងមកនេះ ប៉ុន្តែស្ថិតនៅក្រោមសម្ពាធយ៉ាងខ្លាំងរបស់សហរដ្ឋអាមេរិកឲ្យធ្វើបន្ថែមទៀត ដើម្បីការពារខ្លួនពីការគំរាមកំហែងកាន់តែខ្លាំងឡើងៗ ពីសំណាក់ប្រទេសចិន ដែលអះអាងថា កោះនេះ គឺជាផ្នែកមួយនៃដែនដីរបស់ខ្លួន ហើយមិនបានច្រានចោលការប្រើប្រាស់កម្លាំង ក្នុងការនាំយកកោះនេះឲ្យមកស្ថិតក្រោមការគ្រប់គ្រងឡើយ។

លោក Lai ដែលគណបក្សប្រជាធិបតេយ្យជឿនលឿន (DPP) របស់លោក បានបាត់បង់សំឡេងភាគច្រើននៅក្នុងសភា អំឡុងការបោះឆ្នោតដែលបានជួយឲ្យលោកឡើងកាន់អំណាចនៅឆ្នាំ២០២៤ បានសន្យាថា នឹងបង្កើនការចំណាយលើវិស័យការពារជាតិឲ្យដល់ជាង ៣ភាគរយនៃផលិតផលក្នុងស្រុកសរុប (GDP) នៅឆ្នាំ២០២៦ នេះ។

ប៉ុន្តែការមិនចុះសម្រុងគ្នាយ៉ាងខ្លាំងក្លា រវាងគណបក្ស DPP និងគណបក្សប្រឆាំងដែលកាន់កាប់អាសនៈច្រើនបំផុតនៅក្នុងសភា បានឈានដល់ចំណុចខ្ពស់បំផុត ដែលសំណើរបស់រដ្ឋាភិបាលនេះ ត្រូវបានរារាំងដល់ទៅ ១០ដងហើយ គិតចាប់តាំងពីដើមខែធ្នូឆ្នាំមុន។

កាលពីថ្ងៃព្រហស្បតិ៍ (ទី៥ ខែកុម្ភៈ ឆ្នាំ២០២៦) លោក Lai បានទទូចថា៖ «យើងត្រូវតែបន្តពង្រឹងវិស័យការពារជាតិរបស់យើង»។ ហើយលោកបានអំពាវនាវម្តងទៀតឲ្យគណបក្សប្រឆាំងពិនិត្យឡើងវិញនូវថវិកាការពារជាតិពិសេសចំនួន ៤០ពាន់លានដុល្លាររបស់រដ្ឋបាលនេះ និងថវិកាទូទៅឆ្នាំ២០២៦ របស់ខ្លួន ដែលក៏កំពុងស្ថិតក្នុងភាពមិនច្បាស់លាស់ផងដែរនៅក្នុងសភា។

ដោយត្រូវបានបង្ហាញនៅក្នុងខែវិច្ឆិកា ផែនការសម្រាប់ការចំណាយបន្ថែមលើវិស័យការការពារជាតិនេះ បានកើតឡើង ស្របពេលដែលកោះនេះកំពុងស្វែងរកការទប់ទល់នឹងការលុកលុយដែលអាចកើតមានរបស់ប្រទេសចិន៕