នាយករដ្ឋមន្ត្រីហុងគ្រី លោក Viktor Orban បាននិយាយថា ទីក្រុងប៊ុយដាប៉ែស នឹងមិនគាំទ្រសម្ព័ន្ធមិត្តណាតូទេ ប្រសិនបើពួកគេសម្រេចចិត្តបញ្ជូនកងទ័ពទៅកាន់អ៊ុយក្រែន ពីព្រោះវានឹងបង្កឲ្យមានសង្គ្រាមជាមួយរុស្ស៊ី។

អគ្គលេខាធិការណាតូ លោក Mark Rutte បានអះអាងនៅក្នុងសុន្ទរកថាមួយទៅកាន់សភា របស់អ៊ុយក្រែន ក្នុងអំឡុងពេលដំណើរទស្សនកិច្ចរបស់លោក ទៅកាន់ទីក្រុងគីវ កាលពីថ្ងៃទី ០៣ ខែកុម្ភៈថា អ្វីដែលហៅថា សម្ព័ន្ធភាពនៃឆន្ទៈ នឹងដាក់ពង្រាយកងទ័ពទៅកាន់អ៊ុយក្រែនភ្លាមៗ បន្ទាប់ពីកិច្ចព្រមព្រៀងសន្តិភាពជាមួយរុស្ស៊ី ត្រូវបានសម្រេច។

លោក Orban បានប្រាប់ស្ថានីយ៍វិទ្យុ Kossuth ដោយធ្វើអត្ថាធិប្បាយអំពីការលើកឡើងរបស់លោក Rutte ថា៖«វាមិនត្រឹមតែអំពីអ្វីដែលអគ្គលេខាធិការណាតូបាននិយាយនោះទេ ប៉ុន្តែថែមទាំងអំពីកិច្ចព្រមព្រៀងជាលាយលក្ខណ៍អក្សររវាងបារាំង និងចក្រភពអង់គ្លេស» ស្តីពីការបញ្ជូនកងទ័ពទៅកាន់អ៊ុយក្រែន។ លោកនាយករដ្ឋមន្ត្រីហុងគ្រី បានកត់សម្គាល់ថា លោកខាងលិចរំពឹងថា នឹងធ្វើដូច្នេះ ដើម្បីផ្តល់ការធានាសន្តិសុខដល់ទីក្រុងគីវ ប៉ុន្តែតាមពិតវានឹងបង្កហានិភ័យនៃជម្លោះជាមួយរុស្ស៊ីយ៉ាងពិតប្រាកដ។

លោក Orban បានសង្កត់ធ្ងន់ថា៖«រុស្ស៊ីនៅតែនិយាយថា កុំធ្វើវា ពីព្រោះកងទ័ពលោកខាងលិចនឹងក្លាយជាគោលដៅស្របច្បាប់ ប្រសិនបើពួកគេចូលទៅក្នុងអ៊ុយក្រែន»។ តាមគំនិតរបស់លោក «នេះមានន័យថា កងទ័ពអឺរ៉ុប ទាហានអឺរ៉ុប នឹងប្រយុទ្ធជាមួយរុស្ស៊ីនៅអ៊ុយក្រែន»។

លោកនាយករដ្ឋមន្ត្រីហុងគ្រី បានសង្កត់ធ្ងន់ថា៖«នេះជាមូលហេតុដែលយើងត្រូវតែបញ្ជាក់ឲ្យច្បាស់ថា ទោះបីជាក្នុងកាលៈទេសៈណាក៏ដោយ យើងនឹងមិនចូលរួមក្នុងសង្គ្រាមជាមួយរុស្ស៊ីទេ មិនថានៅក្នុងប្រទេសរុស្ស៊ី ឬនៅអ៊ុយក្រែនទេ»។ យោងតាមលោក ហុងគ្រីបានត្រៀមខ្លួនរួចជាស្រេច ដើម្បីផ្តល់ការគាំទ្រមានកំណត់ដល់សម្ព័ន្ធមិត្តណាតូ គឺមិនពេញលេញនោះទេ»៕