អ្នកស្រុករស់នៅក្នុងភូមិ Woro ស្ថិតក្នុងរដ្ឋ Kwara របស់ប្រទេសនីហ្សេរីយ៉ា បន្តបញ្ចុះសាកសពជនរងគ្រោះរយៈពេល ៣ថ្ងៃ ក្រោយក្រុមសកម្មប្រយុទ្ធជីហាដសង្ស័យ សម្លាប់មនុស្សយ៉ាងហោច ១៧០នាក់ នៅក្នុងការសម្លាប់រង្គាលមួយដែលបានចាប់ផ្តើមឡើងជាមួយនឹងការក្លែងខ្លួនធ្វើជាគ្រូគង្វាល ។

លោក Muhammed Abdulkareem គឺជាអ្នកស្រុកមួយរូបនិយាយប្រាប់ទីភ្នាក់ងារព័ត៌មានរ៉យទ័រថា មូលហេតុដែលពួកគេនិយាយថា ពួកគេមកទីនេះក្នុងនាមជាគ្រូគង្វាល គឺជាដើមចមដែលធ្វើឲ្យមានមនុស្សស្លាប់ និងមនុស្សរងរបួសច្រើនបែបនេះ ។

លោក Muhammadu Muhammad ជាអ្នកស្រុកមួយរូបទៀតនៅរដ្ឋ Kwara និយាយថា លោកបានបាត់បង់កូនបីនាក់នៅក្នុងការវាយប្រហារនោះ។ លោកនិយាយថា លោកមិនអាចពន្យល់បានទេពីការឈឺចាប់ដែលលោកមាន ព្រោះលោកមិនអាចជួបកូនទាំងបីនាក់របស់លោកបានទៀតទេ ។ 

ក្រុមអ្នកស្រុកនិយាយថា អ្នកវាយប្រហារគឺជាអ្នកប្រកាន់តឹងខាងសាសនា ដែលបានផ្សព្វផ្សាយសាសនាជាយូរមកហើយនៅក្នុងភូមិ ដោយជំរុញឲ្យអ្នកស្រុកក្នុងតំបន់បោះបង់ចោលរដ្ឋនៅនីហ្សេរីយ៉ាមួយនេះ ។

ពួកគេនិយាយទៀតថា អ្នករាល់គ្នាដែលពួកគេបានជួប គឺពួកគេបាញ់សម្លាប់ចោល មានតែស្រ្តីទេដែលរួចផុតពីការបាញ់សម្លាប់ ប៉ុន្តែបើសិនជាបុរស មិនសំខាន់ថាអ្នកជាមនុស្សពេញវ័យ ឬមិនពេញវ័យនោះទេ គឺពួកគេសម្លាប់ចោលទាំងអស់ ។

ខណៈពេលនោះដែរ អគ្គលេខាធិការអង្គការសហប្រជាជាតិ លោក Antonio Guterres បានថ្កោលទោសយ៉ាងដាច់អហង្ការចំពោះការវាយប្រហារភេរវកម្មកាលពីថ្ងៃអង្គារ នៅប្រទេសនីហ្សេរីយ៉ា ដែលត្រូវបានគេរាយការណ៍ថា បានសម្លាប់មនុស្សយ៉ាងហោច ១៧០នាក់ ៕