លីបង់ និងស៊ីរី បានចុះហត្ថលេខាលើកិច្ចព្រមព្រៀងមួយ នៅថ្ងៃសុក្រ (ទី៦ ខែកុម្ភៈ ឆ្នាំ២០២៦) នេះ ដើម្បីផ្ទេរជនជាតិស៊ីរីជាង ៣០០នាក់ ពីពន្ធនាគារលីបង់ ឲ្យទៅបន្តអនុវត្តទោសរបស់ពួកគេ នៅឯប្រទេសកំណើត ជាជំហានមួយដែលទំនងជាជួយកែលម្អទំនាក់ទំនងតានតឹង រវាងប្រទេសជិតខាងទាំង២។

ការចុះហត្ថលេខានេះបានកើតឡើង មួយសប្តាហ៍បន្ទាប់ពីគណៈរដ្ឋមន្ត្រីលីបង់ បានអនុម័តសន្ធិសញ្ញាជាមួយស៊ីរី សម្រាប់ការផ្ទេរអ្នកទោស។ កិច្ចព្រមព្រៀងនេះត្រូវបានចុះហត្ថលេខានៅទីស្នាក់ការរដ្ឋាភិបាល ក្នុងរដ្ឋធានីបេរូត (Beirut) របស់ប្រទេសលីបង់ ដោយឧបនាយករដ្ឋមន្ត្រីលីបង់ លោក Tarek Mitri និងរដ្ឋមន្ត្រីយុត្តិធម៌ស៊ីរី លោក Mazhar al-Wais។

លោក Mitri បានប្រាប់អ្នកសារព័ត៌មានថា «នេះជាជំហានដំបូងដ៏សំខាន់មួយនៅលើផ្លូវនៃការដោះស្រាយដ៏ទូលំទូលាយ ទាក់ទងនឹងអ្នកទោសស៊ីរី នៅក្នុងពន្ធនាគារលីបង់» ដោយលោកបានបន្ថែមថា ការអនុវត្តកិច្ចព្រមព្រៀងនេះ នឹងចាប់ផ្តើមនៅថ្ងៃសៅរ៍ចុងសប្ដាហ៍នេះ។

ចំណែកលោក al-Wais បានបញ្ជាក់ថា៖ «ប្រទេសទាំង២ ចង់បន្តឆ្ពោះទៅមុខ ប៉ុន្តែមានបញ្ហាមួយចំនួនដែលមិនទាន់ដាច់ស្រេច។ ជំហាននេះនឹងជំរុញទំនុកចិត្តដែលមានស្រាប់ ហើយយើងសង្ឃឹមថា ទំនាក់ទំនងនឹងរីកចម្រើនបន្ថែមទៀត»។ 

លោក Mitri បានបន្ថែមថា បន្ទាប់មក មន្ត្រីមកពីប្រទេសជិតខាងទាំង២ នឹងពិភាក្សាអំពីការផ្ទេរអ្នកទោសស៊ីរី ដែលនៅតែរង់ចាំការកាត់ក្តី នៅលីបង់។

គួរបញ្ជាក់ថា លីបង់ និងស៊ីរីមានប្រវត្តិសាស្ត្រដ៏ស្មុគស្មាញ ដោយសារមានជម្លោះជាមួយគ្នា។ ប្រជាជនលីបង់ជាច្រើន មិនពេញចិត្តចំពោះការត្រួតត្រា និងវត្តមានយោធាជិត ៣ទសវត្សរ៍នៅក្នុងប្រទេសរបស់ពួកគេ ដោយកងកម្លាំងស៊ីរី ដែលបានបញ្ចប់នៅឆ្នាំ២០០៥៕