​បាល់ទាត់៖ ​ការប្រកួត​ក្របខណ្ឌ UEFA Champions League រកឃើញ ៨ក្រុម​ឡើង​វគ្គ ១/៤ ផ្តាច់ព្រ័ត្រ​ក្រោយ Chelsea និង Villarreal រកបាន​ជ័យជំនះ​រៀងខ្លួន​យប់មិញ​។ ​​តោ​ខៀវ Chelsea ដែល​យកឈ្នះ​ជើងឯក​បារាំង Lille ២-០ កាលពី​ជើង​ទី ១ នៅ​ទីក្រុង​ឡុង​ដ៍​នោះបាន​បន្ត​យកឈ្នះ​នៅ​ទឹកដី​បារាំង ២-១ ទៀត​។

​​ខ្សែប្រយុទ្ធ​ទួរគី Burak Yilmaz រកបាន​គ្រាប់​នាំមុខ​មុន​ឱ្យ Lille នៅ​នាទី​ទី ៣៨ ដោយ​បាល់​ពិន័យ ១១ម៉ែត្រផ្តល់​ក្តីសង្ឃឹម​ខ្លះ​មកវិញ​។ ​​យ៉ាងណាក្តី Christian Pulisic តាម​ស្មើ​វិញ​មុន​ចប់​វគ្គ​ទី ១ នៅ​នាទី​ទី ៤៥+៣ មុនពេល​ដែល Azpilicueta ជា​អ្នកសំរេច​គ្រាប់​ជ័យជំនះ​នៅ​វគ្គ​ទី ២ ឱ្យ Chelsea យកឈ្នះ​នៅ​ទឹកដី Lille ២-១ និង​សរុប​ទាំងពីរ​ជើង ៤-១​។ ​​ចំណែក​មួយគូ​ទៀត​យប់មិញ​ជើងឯក Europa League, Villarreal បាន​យកឈ្នះ​ក្រុម​យក្ស​អ៊ីតាលី Juventus ៣-០ នៅ​ទីក្រុង Turin​។ ​ក្រុម​ទាំងពីរ​ស្មើគ្នា ១-១ កាលពី​ជើង​ទី ១ នៅ​ទឹកដី​អេ​ស្ប៉ា​ញ តែ​ត្រលប់​មកកាន់​ទឹកដី​អ៊ីតាលី​វិញ គ្រប់យ៉ាង​ក្រឡាប់ចាក់​នៅពេល​ការប្រកួត​នៅសល់ ១២នាទី​ទៀត​ចប់​។

​​Gerard Moreno ជា​អ្នក​ស៊ុត​បាល់​ពិន័យ ១១ម៉ែត្រ​នាំមុខ​ឱ្យ Villarreal នៅ​នាទី​ទី ៧៨ ក្រោយ​កំហុស​របស់ Daniele Rugani មុន​ពេលដែល​ខ្សែការពារ Pau Torres បន្ថែម​គ្រាប់​ទី​ពីរ​បញ្ចប់​ក្តីសង្ឃឹម​របស់ Juventus ហើយក៏​មិនទាន់​អស់​ទៀត Arnaud Danjuma ស៊ុត​បាល់​ពិន័យ ១១ម៉ែត្រ​ឱ្យ Villarreal នៅ​នាទី​ទី ៩០+២ យកឈ្នះ Juventus ជើង​ទី ២ នេះ ៣-០ និង​សរុប​ទាំងពីរ​ជើង ៤-១​។ ​​ដូច្នេះ​វគ្គ ៨ ក្រុម​ចុងក្រោយ​រកឃើញ​អស់ហើយ​រួមមាន Villarreal, Chelsea, Manchester City, Liverpool, Atletico Madrid, Real Madrid, Bayern Munich និង Benfica ខណៈ​ការចាប់ឆ្នោត​នឹងធ្វើ​ឡើង​នៅ​ថ្ងៃ​សុក្រ​នេះ​៕

​អត្ថបទ​៖​នាង សុភា​វុ​ធ