ប្រធានាធិបតីអ៊ីរ៉ង់ លោក Masoud Pezeshkian បានអំពាវនាវឱ្យសហរដ្ឋអាមេរិកគោរពប្រទេសរបស់លោក ខណៈប្រទេសទាំងពីរកំពុងសម្លឹងមើលទៅមុខសម្រាប់ការចរចានុយក្លេអ៊ែរជុំមួយទៀតនៅពេលក្រោយ បន្ទាប់ពីការពិភាក្សាមានការសម្របសម្រួលនៅក្នុងប្រទេសអូម៉ង់។

លោកបានសរសេរក្នុងសារមួយលើបណ្ដាញសង្គម X កាលពីថ្ងៃអាទិត្យថា ហេតុផលរបស់ពួកលោកលើបញ្ហានុយក្លេអ៊ែរគឺផ្អែកលើសិទ្ធិដែលមានចែងក្នុងសន្ធិសញ្ញាមិនរីកសាយអាវុធនុយក្លេអ៊ែរ។ ប្រជាជាតិអ៊ីរ៉ង់តែងតែឆ្លើយតបទៅនឹងការគោរពដោយការគោរព ប៉ុន្តែមិនអាចទប់ទល់នឹងភាសានៃកម្លាំងបានទេ។

លោក Pezeshkian បានហៅកិច្ចចរចាដោយប្រយោលដែលបានធ្វើឡើងនៅក្នុងប្រទេសអូម៉ង់កាលពីថ្ងៃសុក្រសប្ដាហ៍មុន ថាជា “ជំហានទៅមុខ” ហើយបាននិយាយថារដ្ឋបាលរបស់លោកពេញចិត្តនឹងការសន្ទនានោះ។

ក្រុមមន្ត្រីអ៊ីរ៉ង់កំពុងបញ្ជាក់ពីអធិបតេយ្យភាព និងឯករាជ្យភាព ហើយកំពុងបង្ហាញពីការខ្នះខ្នែងសម្រាប់ការចរចាតែលើបញ្ហានុយក្លេអ៊ែរ ប៉ុណ្ណោះ ខណៈបដិសេធការបង្កើនកម្លាំងយោធានៅក្នុងតំបន់ពីសំណាក់សហរដ្ឋអាមេរិក។

ថ្លែងនៅក្នុងវេទិកាមួយដែលរៀបចំឡើងដោយក្រសួងការបរទេសនៅទីក្រុងតេអេរ៉ង់ ប្រមុខការទូតរបស់ប្រទេសនេះ លោក Abbas Araghchi បានចង្អុលបង្ហាញថា សាធារណរដ្ឋអ៊ីស្លាមតែងតែសង្កត់ធ្ងន់លើឯករាជ្យភាពចាប់តាំងពីការផ្តួលរំលំរបបលោក Mohammad Reza Shah Pahlavi ដែលគាំទ្រដោយសហរដ្ឋអាមេរិកនៅក្នុងបដិវត្តន៍ឆ្នាំ ១៩៧៩ ៕