សារព័ត៌មានអ៊ីរ៉ង់អន្តរជាតិ (Iran International) បានរាយការណ៍កាលពីថ្ងៃអាទិត្យ (៨ កុម្ភៈ) ថា ជនជាតិអ៊ីរ៉ង់ ដែលកំពុងរស់នៅក្នុងប្រទេសអ៊ីរ៉ង់ បានផ្ញើសារចំនួនរាប់រយសារទៅកាន់សារព័ត៌មានមួយនេះ ដោយជំរុញឱ្យលោកប្រធានាធិបតីអាមេរិក Donald Trump កុំចរចាជាមួយរបបសាធារណរដ្ឋអ៊ិស្លាម ដោយព្រមានថា កិច្ចចរចានឹងធ្វើឱ្យការគាបសង្កត់ពីអាជ្ញាធរក្លាយជាររឿងស្របច្បាប់ និងក្បត់ក្រុមបាតុករ ដែលត្រូវបានសម្លាប់ដោយកងកម្លាំងសន្តិសុខ។

សារពីមនុស្សនៅក្នុងប្រទេសអ៊ីរ៉ង់ បានអំពាវនាវដោយផ្ទាល់ដល់លោក Trump ឱ្យបោះបង់ចោលផ្លូវការទូត ហើយជំនួសមកវិញដោយការគាំទ្រនូវអ្វីដែលពួកគេពិពណ៌នាថា ជាការតស៊ូទូទាំងប្រទេសដើម្បីសេរីភាព និងលទ្ធិប្រជាធិបតេយ្យ។

សារជាច្រើនផ្សេងទៀតពីអ៊ីរ៉ង់ បានលើកឡើងពីការតវ៉ាថ្មីៗនេះនិងការឆ្លើយតបដ៏កាចសាហាវដោយកងកម្លាំងសន្តិសុខ ដោយនិយាយថា ការចរចានឹងផ្ដល់ភាពស្របច្បាប់ឱ្យរដ្ឋាភិបាលមួយដែលពួកគេនិយាយថា «ដៃប្រឡាក់ទៅដោយឈាម»។ សារមួយចំនួនដែលទទួលបានពីទីក្រុង Qazvin របស់អ៊ីរ៉ង់ ព្រមានថា ការចរចានឹងធ្វើឱ្យក្រុមបាតុករធ្លាក់ទឹកចិត្ត និងប៉ះពាល់ដល់ចលនាតស៊ូជាច្រើនខែ។

ក្រុមមន្រ្តីជាន់ខ្ពស់មកពីអ៊ីរ៉ង់ និងអាមេរិក បានបើកកិច្ចចរចានុយក្លេអ៊ែរដោយប្រយោលកាលពីថ្ងៃសុក្រ សប្ដាហ៍មុន នៅអូម៉ង់ ដោយភាគីទាំងពីរបានពិពណ៌នាថាជា «កិច្ចពិភាក្សាវិជ្ជមាន» និងសន្យាថានឹងបន្តចរចាទៀត ទោះបីជាការខ្វែងគំនិតគ្នានៅតែមានក៏ដោយ។ ការណ៍នោះបានបន្ធូរបន្ថយការភ័យខ្លាចថា បរាជ័យក្នុងការឈានដល់កិច្ចព្រមព្រៀងមួយ អាចធ្វើឱ្យមជ្ឈិមបូព៌ាកាន់តែខិតជិតសង្គ្រាម ស្របពេលដែលអាមេរិក បានដាក់ពង្រាយកងកម្លាំងយោធាដ៏ច្រើនសន្ធឹកសន្ធាប់នៅក្នុងតំបន់នោះ៕