យោធាអ៊ីស្រាអែល និងប្រព័ន្ធផ្សព្វផ្សាយរដ្ឋលីបង់ បានរាយការណ៍ថា នៅក្នុងប្រតិបត្តិការមួយនៅភាគខាងត្បូងប្រទេសលីបង់ នៅព្រឹកថ្ងៃចន្ទនេះ កងកម្លាំងអ៊ីស្រាអែលបានចាប់ខ្លួនមន្ត្រីមូលដ្ឋានម្នាក់របស់ក្រុមអ៊ីស្លាមនិកាយស៊ុននី និងសម្ព័ន្ធមិត្តរបស់ក្រុមសកម្មប្រយុទ្ធប៉ាឡេស្ទីនហាម៉ាស ហើយបាននាំខ្លួនទៅអ៊ីស្រាអែល ដើម្បីសួរចម្លើយ។ 

នៅថ្ងៃចន្ទនេះផងដែរ យានដ្រូនរបស់អ៊ីស្រាអែល បានវាយប្រហារលើរថយន្តមួយគ្រឿង នៅក្នុងភូមិ Yanouh ភាគខាងត្បូងប្រទេសលីបង់ ដោយបានសម្លាប់មនុស្សបីនាក់ ក្នុងនោះមានកុមារម្នាក់ នេះបើយោងតាមទីភ្នាក់ងារសារព័ត៌មានជាតិលីបង់។ ពុំមានការអត្ថាធិប្បាយភ្លាមៗពីអ៊ីស្រាអែលអំពីការវាយប្រហារនេះទេ។

យោងតាមទីភ្នាក់ងារសារព័ត៌មាន NNA លោក Atwi Atwi ដែលជាមន្ត្រីមូលដ្ឋានម្នាក់របស់ក្រុមអ៊ីស្លាមនិកាយស៊ុននី Al-Jamaa Al-Islamiya ឬក្រុមអ៊ីស្លាមជាភាសាអង់គ្លេស0 ត្រូវបានចាប់ខ្លួន នៅក្នុងភូមិ Hebbarieh ភាគខាងត្បូង ក្នុងតំបន់ Hasbaya និងនៅជិតព្រំដែនជាមួយអ៊ីស្រាអែល។

សេចក្តីថ្លែងការណ៍មួយពីយោធាអ៊ីស្រាអែល បានឲ្យដឹងថា កងទ័ពអ៊ីស្រាអែលបានចាប់ខ្លួនមន្ត្រីក្រុម  អ៊ីស្លាមម្នាក់នៅក្នុង «ប្រតិបត្តិការផ្អែកលើចារកម្មគោលដៅ» ដោយមិនបានបង្ហាញឈ្មោះមន្ត្រីនោះទេ។

ក្រុមអ៊ីស្លាមបានថ្កោលទោសចំពោះការចាប់ខ្លួននេះ ដោយនិយាយថា នេះគឺជាផ្នែកមួយនៃការវាយប្រហារប្រចាំថ្ងៃរបស់អ៊ីស្រាអែល និងការរំលោភលើអធិបតេយ្យភាពរបស់ប្រទេសលីបង់។ ពួកគេបានអំពាវនាវឲ្យរដ្ឋលីបង់ធ្វើការ ដើម្បីដោះលែងលោក Atwi៕