មេដឹកនាំប្រទេសអូស្ត្រាលីនៅថ្ងៃអង្គារ ទី១០ ខែកុម្ភៈនេះ បានជំរុញឱ្យមានភាពស្ងប់ស្ងាត់ និងអំពាវនាវចំពោះការតវ៉ាត្រូវធ្វើឡើងដោយសន្តិវិធីបន្ទាប់ពីការប៉ះទង្គិចគ្នារវាងនគរបាលនិងក្រុមបាតុករដែលប្រឆាំងដំណើរទស្សនកិច្ចរបស់ប្រធានាធិបតីអ៊ីស្រាអែល លោក Isaac Herzog ទៅកាន់ប្រទេសអូស្ត្រាលី បានផ្ទុះឡើងនៅទីក្រុងស៊ីដនី។

នគរបាលនិយាយថា មនុស្ស២៧នាក់ត្រូវបានចាប់ខ្លួន រួមទាំង១០នាក់តាមដែលចោទប្រកាន់ថាបានវាយប្រហារលើមន្ត្រីនគរបាល បន្ទាប់ពីអំពើហិង្សាបានផ្ទុះឡើងកាលពីល្ងាចថ្ងៃចន្ទ។

នាយករដ្ឋមន្ត្រី លោក Anthony Albanese បាននិយាយថា លោកមានការ «មានការរន្ធត់ចិត្តយ៉ាងខ្លាំង» ជុំវិញការកើតមានអំពើហិង្សា ហើយបានជំរុញឱ្យក្រុមបាតុករបញ្ចេញមតិរបស់ខ្លួនដោយសន្តិវិធី។ លោក Albanese បាននិយាយថា «ប្រជាជនអូស្ត្រាលីចង់បានរឿងពីរ។ ពួកគេមិនចង់ឱ្យជម្លោះនាំមកដល់ទីនេះទេ។ ពួកគេចង់ឱ្យការសម្លាប់ត្រូវបញ្ឈប់ មិនថាអ៊ីស្រាអែល ឬប៉ាឡេស្ទីនទេ ប៉ុន្តែពួកគេមិនចង់ឱ្យជម្លោះត្រូវបាននាំមកដល់ទីនេះឡើយ»។ មនុស្សរាប់ពាន់នាក់បានមកប្រមូលផ្តុំគ្នានៅទីក្រុងស៊ីដនីកាលពីថ្ងៃចន្ទ ដើម្បីតវ៉ាប្រឆាំងដំណើរទស្សនកិច្ចរបស់លោក Herzog ទៅកាន់ប្រទេសអូស្ត្រាលី ដែលបានកើតឡើងបន្ទាប់ពីការបាញ់ប្រហារទ្រង់ទ្រាយធំនៅក្នុងព្រឹត្តិការណ៍សាសនាជ្វីហ្វនៅឆ្នេរ Bondi កាលពីខែធ្នូដែលបានសម្លាប់មនុស្ស១៥នាក់។ នគរបាលត្រូវបានអនុញ្ញាតឱ្យប្រើប្រាស់អំណាចដ៏កម្រក្នុងអំឡុងពេលតវ៉ា រួមទាំងការណែនាំហ្វូងមនុស្សឱ្យចាកចេញ និងការរឹតបន្តឹងការចូលទៅកាន់តំបន់មួយចំនួន។ ការប្រឈមផ្លូវច្បាប់ចំពោះការរឹតបន្តឹងទាំងនោះត្រូវបានតុលាការទីក្រុងស៊ីដនីច្រានចោលកាលពីថ្ងៃចន្ទ។ លោក Herzog ពុំមានវត្តមាននៅកន្លែងតវ៉ាទេ។ វីដេអូបានបង្ហាញពីក្រុមបាតុករមួយចំនួនកំពុងព្យាយាមរុញច្រានការបិទផ្លូវ ខណៈមន្ត្រីបានបង្ខំពួកគេឱ្យត្រឡប់ទៅវិញ ខណៈគរបាលបានប្រើប្រាស់ឧស្ម័នបង្ហៀរទឹកភ្នែក និងបាញ់ម្រេចដើម្បីបំបែកហ្វូងមនុស្ស។