លោកស្រីនាយករដ្ឋមន្ត្រីជប៉ុន Sanae Takaichi បាននិយាយកាលពីថ្ងៃចន្ទ៩ កុម្ភៈសប្ដាហ៍នេះ ថា      រដ្ឋាភិបាលរបស់លោកស្រី ផ្តោតលើសន្តិសុខជាតិ បន្ទាប់ពីជ័យជម្នះដ៏ច្រើនលើសលប់របស់គណបក្សប្រជាធិបតេយ្យសេរី ( LDP )របស់លោកស្រី នៅក្នុងការបោះឆ្នោតសកលថ្ងៃអាទិត្យ ៨ កុម្ភៈ។

លោកស្រី Takaichi បាននិយាយថា “កាលពីម្សិលមិញ ប្រជាជននៃប្រទេសយើងបានរុញយើងយ៉ាងខ្លាំងទៅមុខ ដោយជំរុញឱ្យយើងបន្តការផ្លាស់ប្តូរគោលនយោបាយ មិនថាមានរឿងអ្វីកើតឡើងក៏ដោយ”។

ទំហំនៃជ័យជម្នះ ដោយរដ្ឋាភិបាលចម្រុះទទួលបានសំឡេង៣៥២ អាសនៈក្នុងចំណោម ៤៦៥ អាសនៈនៅក្នុងសភាជាន់ទាបនៃសភាជប៉ុន បានធ្វើឱ្យការប្រឆាំងក្នុងស្រុកចំពោះរបៀបវារៈសន្តិសុខដ៏តឹងរ៉ឹងរបស់លោកស្រី Takaichi ថយចុះ ដោយលើកទឹកចិត្តផែនការឱ្យបន្តពង្រីកវិស័យការពារជាតិ ដែលប្រទេសចិនបានថ្កោលទោសថាជាការវិលត្រឡប់ទៅរកយោធានិយម។

លោកស្រី Takaichi បានប្រាប់ក្រុមអ្នកសារព័ត៌មាននៅទីក្រុងតូក្យូថា ប្រទេសជប៉ុននៅតែបើកចំហចំពោះទម្រង់ផ្សេងៗនៃការសន្ទនាជាមួយប្រទេសចិន។ កាលពីខែវិច្ឆិកា លោកស្រីបានបង្កឱ្យមានព្យុះភ្លៀងការទូតជាមួយទីក្រុងប៉េកាំង ដោយលើកឡើងថា ប្រទេសជប៉ុនអាចឆ្លើយតបដោយយោធាចំពោះការវាយប្រហារណាមួយរបស់ចិនលើកោះតៃវ៉ាន់ដឹកនាំដោយលទ្ធិប្រជាធិបតេយ្យ ប្រសិនបើចិនក៏គំរាមកំហែងដល់ទឹកដីជប៉ុនផងដែរ។

មេដឹកនាំជប៉ុនរូបនេះ ក៏បានសម្តែងការគាំទ្រចំពោះគោលដៅសន្តិសុខដែលត្រូវបានហាមប្រាមជាយូរមកហើយដែរ ដោយកែប្រែរដ្ឋធម្មនុញ្ញសន្តិភាពនិយមរបស់ជប៉ុន ដើម្បីទទួលស្គាល់កងកម្លាំងស្វ័យការពារជាយោធា ជាផ្លូវការ ៕