យោធារបស់ទីក្រុងគីវ បាននិយាយកាលពីថ្ងៃចន្ទ (៩ កុម្ភៈ) ថា កងកម្លាំងរុស្ស៊ី កំពុងព្យាយាមវាយរុញទៅមុខនៅជុំវិញទីក្រុង Pokrovsk ភាគខាងកើតរបស់អ៊ុយក្រែន ក្នុងក្ដីសង្ឃឹមថា នឹងអាចបញ្ចប់យុទ្ធនាការរយៈពេលជាច្រើនខែរបស់ខ្លួន ដើម្បីដណ្តើមយកមជ្ឈមណ្ឌលយុទ្ធសាស្ត្រមួយនេះ ខណៈទីក្រុងមូស្គូ កំពុងព្យាយាមដណ្តើមយកទឹកដីតំបន់ Donetsk ទាំងមូល។

អ៊ុយក្រែន កំពុងជួបការលំបាកដើម្បីបញ្ឈប់ការវាយរុលទៅមុខយឺតៗរបស់រុស្ស៊ី នៅជុំវិញតំបន់ Pokrovsk និងកន្លែងផ្សេងទៀត តាមបណ្តោយសមរភូមិជួរមុខប្រវែង ១.២០០គីឡូម៉ែត្រ ខណៈទីក្រុងគីវ ក៏កំពុងស្ថិតក្រោមសម្ពាធរបស់សហរដ្ឋអាមេរិក លើការឈានដល់កិច្ចព្រមព្រៀងសន្តិភាពមួយដើម្បីបញ្ចប់សង្គ្រាមរយៈពេល ៤ឆ្នាំ នៅក្នុងកិច្ចចរចាសន្តិភាពដែលកំពុងបន្ត។

នាយសេនាធិការអ៊ុយក្រែន បាននិយាយកាលពីថ្ងៃចន្ទថា កងកម្លាំងរបស់ខ្លួននៅតែកាន់កាប់ផ្នែកខាងជើងនៃទីក្រុង Pokrovsk ដែលធ្លាប់មានប្រជាជនមុនសង្គ្រាមចំនួន ៦ម៉ឺននាក់ ហើយក៏កំពុងការពារទីក្រុងមួយទៀតឈ្មោះ Myrnohrad ដែលនៅក្បែរនោះផងដែរ។ ទីក្រុង Pokrovsk នេះគឺជាចំណុចប្រសព្វផ្លូវដែក និងជាទីតាំងនៃការប្រយុទ្ធគ្នាយ៉ាងខ្លាំងក្លាចាប់តាំងពីឆ្នាំមុនមក។ ការដួលរលំរបស់ក្រុងនេះ នឹងក្លាយជាជ័យជម្នះដ៏ធំបំផុតរបស់រុស្ស៊ី ចាប់តាំងពីខ្លួនបានដណ្តើមយកទីក្រុង Avdiivka ភាគខាងកើតនៅដើមឆ្នាំ២០២៤។

នៅចុងឆ្នាំមុន រុស្ស៊ីអះអាងថា ខ្លួនបានដណ្តើមយកទីក្រុង Pokrovsk នេះរួចទៅហើយ ប៉ុន្តែអ៊ុយក្រែនបានបដិសេធ។ រយៈពេលជិត ៤ឆ្នាំបន្ទាប់ពីប្រតិបត្តិការយោធាពិសេសទ្រង់ទ្រាយធំរបស់ខ្លួននៅថ្ងៃទី២៤ ខែកុម្ភៈ ឆ្នាំ២០២២ រុស្ស៊ីបានកាន់កាប់ស្ទើរតែ ១ភាគ៥ នៃទឹកដីអ៊ុយក្រែន រួមទាំងឧបទ្វីបគ្រីម៉េ និងផ្នែកខ្លះនៃភាគខាងកើតអ៊ុយក្រែន ដែលត្រូវបានកាន់កាប់មុនសង្គ្រាម៕