ប្រទេសបង់ក្លាដែស ទទួលបានការកាត់បន្ថយពន្ធគយមកត្រឹម ១៩% របស់សហរដ្ឋអាមេរិក ក្រោមកិច្ចព្រមព្រៀងពាណិជ្ជកម្មមួយ ដែលបានចុះហត្ថលេខារវាងប្រទេសទាំងពីរកាលពីថ្ងៃចន្ទ (៩ កុម្ភៈ) ដោយផ្តល់នូវការលើកលែងមួយចំនួនសម្រាប់វាយនភណ្ឌ និងសម្លៀកបំពាក់ ដែលផលិតពីវត្ថុធាតុដើមរបស់សហរដ្ឋអាមេរិក។

សេតវិមានបាននិយាយថា បង់ក្លាដែស បានយល់ព្រមផ្តល់សិទ្ធិចូលទីផ្សារប្រកបដោយការអនុគ្រោះដ៏សំខាន់ សម្រាប់ទំនិញឧស្សាហកម្ម និងកសិកម្មរបស់សហរដ្ឋអាមេរិក រួមទាំងសារធាតុគីមី ឧបករណ៍វេជ្ជសាស្ត្រ គ្រឿងចក្រ ព្រមទាំងផលិតផលជាច្រើនទៀត។ សេតវិមានបានបន្ថែមថា បង់ក្លាដែសក៏នឹងបន្ធូរបន្ថយរបាំងមិនមែនពន្ធគយផងដែរក្នុងចំណោមចំណុចជាច្រើនផ្សេងទៀត។

ភាគីទាំងពីរក៏បានកត់សម្គាល់ពីកិច្ចព្រមព្រៀងពាណិជ្ជកម្មថ្មីៗ និងកិច្ចព្រមព្រៀងនាពេលខាងមុខ រួមទាំងការទិញយន្តហោះ ការទិញផលិតផលកសិកម្មរបស់អាមេរិកប្រមាណ ៣,៥ ពាន់លានដុល្លារ និងការទិញផលិតផលថាមពលរបស់អាមេរិកប្រមាណ ១៥ ពាន់លានដុល្លារ ក្នុងរយៈពេល ១៥ឆ្នាំ។

កិច្ចព្រមព្រៀងថ្មីនេះបានផ្ដល់ភាពច្បាស់លាស់ជាងមុនសម្រាប់បង់ក្លាដែស។ ដំបូងឡើយ កាលពីខែសីហា ឆ្នាំ២០២៥កន្លងទៅ ប្រទេសអាស៊ីខាងត្បូងមួយនេះ ធ្លាប់ទទួលការកាត់បន្ថយពន្ធគយរបស់អាមេរិក ម្ដងរួចទៅហើយ លើការនាំចេញរបស់ខ្លួនមកត្រឹម ២០% ពោលគឺធ្លាក់ចុះពីអត្រា ៣៧% ដំបូង របស់ទីក្រុងវ៉ាស៊ីនតោន ដែលផ្តល់នូវភាពធូរស្បើយដល់ស្ថាប័ននាំចេញសម្លៀកបំពាក់របស់ប្រទេស៕