អង្គការសហប្រជាជាតិ (UN) បាននិយាយកាលពីថ្ងៃចន្ទ (៩ កុម្ភៈ) ថា ខ្លួនកំពុងរង់ចាំព័ត៌មានលម្អិតអំពីពេលវេលា និងថវិកាចំនួនប៉ុន្មាន ដែលសហរដ្ឋអាមេរិកនឹងបង់ សម្រាប់វិភាគទានដែលពន្យារពេលរបស់ខ្លួន ក្នុងតួលេខសរុបរាប់ពាន់លានដុល្លារ ដែលអាមេរិកជំពាក់ស្ថាប័នពិភពលោកមួយនេះ បន្ទាប់ពីការសន្យាកាលពីសប្តាហ៍មុនថា ទីក្រុងវ៉ាស៊ីនតោន នឹងផ្ដល់ការទូទាត់ដំបូងក្នុងប៉ុន្មានសប្តាហ៍ខាងមុខ។

លោក Stephane Dujarric អ្នកនាំពាក្យអង្គការសហប្រជាជាតិ បាននិយាយក្នុងសន្និសីទសារព័ត៌មានមួយថា «អង្គការបានឃើញសេចក្តីថ្លែងការណ៍ទាំងនោះហើយ ហើយតាមពិតទៅ លោកអគ្គលេខាធិការបានទាក់ទងជាមួយឯកអគ្គរដ្ឋទូតអាមេរិកប្រចាំ UN គឺលោក Mike Waltz យូរមកហើយលើបញ្ហានេះ»។ លោកបន្តថា៖ ស្ថាប័នពិភពលោកមួយនេះកំពុងរង់ចាំមើលថា «តើពេលណាការទូទាត់នឹងត្រូវធ្វើឡើង និងក្នុងចំនួនទឹកប្រាក់ប៉ុន្មាន»។

លោកអគ្គលេខាធិការ Antonio Guterres បានប្រកាសអាសន្នលើស្ថានភាពហិរញ្ញវត្ថុរបស់អង្គការសហប្រជាជាតិ នៅក្នុងលិខិតមួយចុះថ្ងៃទី២៨ ខែមករា កន្លងទៅ ទៅកាន់រដ្ឋជាសមាជិក ហើយបានព្រមានថា អង្គការដែលមានសមាជិក ១៩៣ ប្រទេសមួយនេះ កំពុងប្រឈមនឹងហានិភ័យនៃ «ការដួលរលំផ្នែកហិរញ្ញវត្ថុដែលជិតមកដល់» ដោយសារតែថ្លៃវិភាគទានមិនទាន់បានបង់។

ក្រុមមន្ត្រី UN និយាយថា អាមេរិក មានថវិកាដែលមិនទាន់បានបង់ជាង ៩៥% ចំពោះថវិកាធម្មតារបស់ UN ហើយប្រទេសនេះជំពាក់ប្រាក់ចំនួន ២,១៩ ពាន់លានដុល្លារត្រឹមដើមខែកុម្ភៈ បូករួមទាំងប្រាក់ចំនួន ២,៤ពាន់លានដុល្លារទៀត សម្រាប់បេសកកម្មរក្សាសន្តិភាពបច្ចុប្បន្ននិងកាលពីមុន និងទឹកប្រាក់ ៤៣,៦ លានដុល្លារសម្រាប់តុលាការ UN ព្រមទាំងថវិកាផ្សេងទៀត៕