អ្នកតំណាងឱ្យសហគ្រាស /សិប្បកម្ម កែច្នែគ្រាប់ស្វាយចន្ទី បានអះអាងថា បច្ចុប្បន្ន នៅ​តាម​ចម្ការ​ស្វាយ​ចន្ទីធំៗ និងទីតាំង សហគ្រាស ឬក៏ សិប្បកម្មកែច្នៃស្វាយចន្ទី កំពុងមាន​តម្រូវ​ការ​កម្លាំង​ពលកម្មជាចាំបាច់ប្រមាណ១២ម៉ឺននាក់ ដើម្បីប្រមូលផលស្វាយចន្ទី ខណៈរដូវ​ប្រមូល​ផល​នឹង​ចូល​មកដល់ពេញលេញចាប់ពីខែក្រោយនេះ តទៅ ដោយពួកគាត់បានអំពាវដល់ប្រជាពលរដ្ឋ ជាពិសេស អតីតពលករ អាចទៅស្វែងការងារនៅតាមទីតាំងចម្ការ ឬតាម​បណ្តា​សហ​គ្រាសផ​លិត​កែច្នែ​គ្រាប់ស្វាយចន្ទីនានានៅទូទាំងប្រទេស។

លោក អួន ស៊ូឡុត ប្រធានសមាគមស្វាយចន្ទីកម្ពុជា បានប្រាប់ BTV ថា វិស័យស្វាយចន្ទី នារដូវ​ប្រមូល​ផលនេះ មានត្រូវការកម្លាំងពលកម្មច្រើនរហូតដល់ប្រមាណ ១២ម៉ឺននាក់ ដើម្បីរើសគ្រាប់​ស្វាយ​ចន្ទី​នៅ​ក្នុងចម្ការ។ លោកបានអំពាវនាវដល់ប្រជាពលរដ្ឋ ជាពិសេស អតីតពលករមកពីថៃ ប្រសិន​បើកំពុងស្វែងរកការងារធ្វើ អាចទៅស៊ីឈ្នួល​រើសគ្រាប់​ស្វាយចន្ទី​នៅ​តាម​ចម្ការ​នានា​នៅ​ទូទាំង​ប្រទេស។ រដូវប្រមូលស្វាយចន្ទីពេញលេញនឹងចាប់ពីខែមីនា ខាងនេះ តទៅ។

លោក ឡាយ គង់ ប្រធានផលិតកម្មក្រុមហ៊ុនផលិតគ្រាប់ស្វាយចន្ទី សានតាណាអាហ្គ្រោ ប្រូដាក់ អ្នក​តំណាងឱ្យរោងចក្រកែច្នៃគ្រាប់ស្វាយចន្ទី អះអាងថា ដោយសារ​ក្រុមហ៊ុន​មាន​ផែន​ការ​បញ្ជាទិ​ញ​គ្រាប់ស្វាយចន្ទីស្រស់រាប់ម៉ឺនតោន ដើម្បីផលិតកែច្នៃសម្រាប់ការនាំចេញ ដូច្នេះក្រុមហ៊ុន មាន​តម្រូវការកម្លាំងពលកម្មរាប់រយនាក់បន្ថែមទៀត នាពេលនេះ។

សូមបញ្ជាក់ថា រដូវប្រមូលផលស្វាយចន្ទីនៅកម្ពុជាជាធម្មតាចាប់ផ្តើមនៅខែកុម្ភៈ ហើយ​បញ្ចប់​នៅ​ខែ​ឧសភា។ ប្រទេសកម្ពុជាមានដីដែលសមស្របអាចដាំដុះដំណាំស្វាយចន្ទីល្អបំផុត ហើយ ខេត្តកំពង់ធំ មានផ្ទៃដីដាំដុះស្វាយចន្ទីធំជាងគេ បន្ទាប់មកខេត្តក្រចេះ និងខេត្តរតនគិរី៕ អត្ថបទ៖ ធូ វិរៈ