ក្រុមអាជ្ញាធរ និយាយថា និយោជិក ៥នាក់ ក្នុងចំណោមនិយោជិក ១០នាក់ ដែលត្រូវបានចាប់ជម្រិតចេញពីអណ្តូងរ៉ែគ្រប់គ្រងដោយក្រុមហ៊ុនកាណាដា នៅប្រទេសម៉ិកស៊ិក កាលពីខែមុន ត្រូវបានគេបញ្ជាក់ថា បានស្លាប់ ។

ការិយាល័យរដ្ឋអាជ្ញាម៉ិកស៊ិកនិយាយកាលពីថ្ងៃចន្ទថា ក្រុមអាជ្ញាធរ បានកំណត់អត្តសញ្ញាណសាកសពមនុស្ស ៥នាក់ ដែលត្រូវបានរកឃើញនៅលើអចលនទ្រព្យមួយកន្លែង ស្ថិតក្នុងតំបន់ជាយក្រុង El Verde រដ្ឋ Sinaloa ហើយពួកគេកំពុងធ្វើការកំណត់អត្តសញ្ញាណកម្មករនៅសេសសល់ ៥នាក់ផ្សេងទៀត ។

ពួកគេនិយាយនៅក្នុងសេចក្តីថ្លែងការណ៍ថា វាសំខាន់ខ្លាំងណាស់ ដើម្បីកត់សំគាល់ថា ក្រុមអាជ្ញាធរនៅតែបន្តទាក់ទងជាមួយសាច់ញាតិរបស់ជនរងគ្រោះ ។

សេចក្តីថ្លែងការណ៍បន្តថា ក្នុងករណីដែលសាកសពត្រូវបានកំណត់អត្តសញ្ញាណ ពួកគេនឹងត្រូវបញ្ជូនទៅកាន់រដ្ឋ Zacatecas នៅក្នុងប្រអប់ចំនួន ២ ក៏ដូចជារដ្ឋ Chihuahua, Sonora និងរដ្ឋ Guerrero ។

ក្រុមអាជ្ញាធរដែលកាលពីសប្តាហ៍មុន បានចាប់ខ្លួនមនុស្ស ៤នាក់ ពាក់ព័ន្ធនឹងករណីចាប់ជម្រិតនេះ នឹងបន្តប្រមូលភ័ស្តុតាង ដើម្បីធានាថា ករណីសម្លាប់នេះ នឹងមិនអាចរួចផុតពីសំណាញ់ច្បាប់បានឡើយ ។

ក្រុមហ៊ុន Vizsla Silver គឺជាប្រតិបត្តិការអណ្តូងរ៉ែមាស និងរ៉ែប្រាក់ Panuco ស្ថិតនៅជិតទីក្រុង Mazatlan រដ្ឋ Sinaloa និយាយកាលពីព្រឹកថ្ងៃចន្ទថា ពួកគេត្រូវបានជូនដំណឹងដោយសមាជិកគ្រួសារជាច្រើននាក់ថា មនុស្សជាទីស្រលាញ់របស់ពួកគេ ត្រូវបានគេប្រទះឃើញស្លាប់ ។

លោក Michael Konnert គឺជាប្រធាន និងជាប្រធានប្រតិបត្តិក្រុមហ៊ុន Vizsla Silver និយាយនៅក្នុងសេចក្តីថ្លែងការណ៍ថា ពួកយើងមានការខកចិត្តជាខ្លាំងចំពោះលទ្ធផលនេះ និងការបាត់បង់អាយុជីវិតដ៏សោកនាដកម្ម ។ ការចូលរួមរំលែកទុក្ខដ៏ក្រៀមក្រំរបស់ពួកយើង នៅជាមួយគ្រួសារនិយោជិក មិត្តភក្តិ និងមិត្តរួមការងាររបស់ពួគគេ ព្រមទាំងសហគមន៍ទាំងមូល ៕