នៅថ្ងៃអង្គារនេះ ជនប៉ាឡេស្ទីនរាប់សិបនាក់ បានវិលត្រឡប់មកកាន់ទីក្រុង Khan Younis ស្ថិតនៅភាគខាងត្បូងទីក្រុងហ្កាហ្សា ក្រោយចំណាយពេលរាប់ខែនៅប្រទេសអេហ្ស៊ីប ដោយបែកបាក់ពីគ្រួសាររបស់ពួកគេ ។

ភាគច្រើននៃពួកគេ បានធ្វើដំណើរទៅកាន់អេហ្ស៊ីប ដើម្បីទទួលបានការព្យាបាល ហើយពួកគេអាចវិលត្រឡប់មកវិញបាន ក្រោយច្រកឆ្លងកាត់ព្រំដែន Rafah រវាងអេហ្ស៊ីប និងតំបន់ហ្កាហ្សា ត្រូវបានបើកឡើងវិញដោយអន្លើរ ។

អ្នកដែលវិលត្រឡប់មកវិញ ត្រូវបានបញ្ជូនទៅកាន់រថយន្តក្រុងដែលមានបិទស្លាកសញ្ញាអង្គការសហប្រជាជាតិ(UN) ហើយនិងអមដំណើរដោយរថយន្តគិលានសង្រ្គោះ និងរថយន្ត UN ។

លោក Mohamed Abu Hamadគឺជាជនប៉ាឡេស្ទីនមួយរូបមកទទួលគ្រួសាររបស់លោក និយាយថា លោកបានរង់ចាំគ្រួសាររបស់លោកដោយអន្ទះសារ ។ ចាប់តាំងពីពួកគេនិយាយថា ពួកគេបើកច្រកព្រំដែនឡើងវិញកាលពីរយៈពេល ៣ខែមុន លោកបានសួរទៅអ្នករាល់គ្នា ថាតើពេលណាទើបគ្រួសាររបស់លោកអាចវិលត្រឡប់មកវិញបាន ប៉ុន្តែអ្វីៗពិតជាពិបាកខ្លាំងណាស់ ។

លោកបន្តថា ពេលដែលច្រកព្រំដែនបើក លោកបានចុះឈ្មោះគ្រួសាររបស់លោក ដើម្បីឲ្យពួកគេអាចវិលត្រឡប់មកផ្ទះវិញបាន បើទោះបីជាពួកគេនៅត្រូវការព្យាបាលក៏ដោយ ពីព្រោះថា ពួកគេគួរតែស្លាប់នៅក្នុងប្រទេសរបស់ខ្លួន មិនមែនត្រូវស្លាប់ឆ្ងាយពីផ្ទះបែបនេះទេ ។

ច្រក Rafah គឺជាច្រកឆ្លងកាត់តែមួយគត់សម្រាប់ពលរដ្ឋជាង ២លាននាក់នៅក្នុងតំបន់ហ្កាហ្សា ។ ការបើកឡើងឡើងវិញដោយអន្លើរ និងមានដែនកំណត់កាលពីសប្តាហ៍មុន បានក្លាយជាជំហានដ៏សំខាន់មួយនៅក្នុងគំនិតផ្តួចផ្តើមគាំទ្រដោយសហរដ្ឋអាមេរិក ដែលត្រូវបានប្រកាសដោយលោកប្រធានាធិបតី Donald Trump ដោយមានគោលដៅបញ្ចប់សង្រ្គាមរវាងអ៊ីស្រាអែល និងក្រុមហាម៉ាស ៕