តុលាការថៃ នៅថ្ងៃអង្គារ (ទី១០ ខែកុម្ភៈ ឆ្នាំ២០២៦) នេះ បានបន្ថែមរយៈពេលរហូតដល់ ៥០ឆ្នាំ សម្រាប់ទោសជាប់ពន្ធនាគាររបស់បុរសម្នាក់ ដែលត្រូវបានផ្ដន្ទាទោសពីបទរិះគន់ព្រះមហាក្សត្ររបស់ប្រទេសនេះ ដោយនេះជាទោសជាប់ពន្ធនាគារយូរបំផុតមួយ ដែលត្រូវបានដាក់ចេញក្រោមច្បាប់ប្រមាថអង្គព្រះមហាក្សត្រដ៏តឹងរ៉ឹងរបស់ព្រះរាជាណាចក្រនេះ។ នេះបើយោងតាមការឲ្យដឹងពីក្រុមអ្នកច្បាប់របស់ក្រុមសិទ្ធិមនុស្ស។

ច្បាប់ប្រមាថព្រះមហាក្សត្ររបស់ប្រទេសថៃ ការពារស្ដេច Maha Vajiralongkorn និងក្រុមញាតិវង្សរបស់ព្រះអង្គ មិនឲ្យមានការរិះគន់ ហើយមានទោសជាប់ពន្ធនាគារយូរបំផុតរហូតដល់ ១៥ឆ្នាំ ក្នុងបទល្មើសមួយករណី។

មេធាវីថៃ ដើម្បីសិទ្ធិមនុស្ស (TLHR) បានឲ្យដឹងនៅក្នុងសេចក្ដីថ្លែងការណ៍ថា តុលាការព្រហ្មទណ្ឌរបស់ប្រទេសនេះ បានកាត់ទោសឈ្មោះ Phuritikon Sarakul ឲ្យជាប់ពន្ធនាគារ ៣០ឆ្នាំ ក្រោមច្បាប់នេះ ពាក់ព័ន្ធនឹងការបង្ហោះដែលបានធ្វើឡើងនៅលើគណនីបណ្ដាញសង្គមរបស់លោក ចន្លោះឆ្នាំ២០២១ និងឆ្នាំ២០២២។

កាលពីខែធ្នូឆ្នាំមុន បុរសវ័យ ៤៣ឆ្នាំដែលរស់នៅក្រៅប្រទេសថៃ ត្រូវបានកាត់ទោសកំបាំងមុខឲ្យជាប់ពន្ធនាគារ ២០ឆ្នាំ សម្រាប់បទល្មើសដូចគ្នា ដោយសារការបង្ហោះតាមប្រព័ន្ធអ៊ីនធឺណិតដាច់ដោយឡែកពីគ្នា។ នេះបើយោងតាមក្រុមសិទ្ធិមនុស្សដដែលនេះ។

ដោយសំដៅទៅលើច្បាប់នេះ តាមបទប្បញ្ញត្តិរបស់វា នៅក្នុងក្រមព្រហ្មទណ្ឌ TLHR បានបន្ថែមថា ការកាត់ទោសរួមបញ្ចូលគ្នា ដែលសរុបទៅមានរយៈពេលជាប់ទោស ៥ទសវត្សរ៍ នៅក្នុងពន្ធនាគារ មានន័យថា រូបគេបានទទួល «ការកាត់ទោសដ៏ធ្ងន់ធ្ងរបំផុតមួយ ក្រោមមាត្រា១១២ ក្នុងប្រវត្តិសាស្ត្រ»។

ក្រុមសិទ្ធិមនុស្ស និងអ្នករិះគន់ លើកឡើងថា ច្បាប់ប្រមាថអង្គព្រះមហាក្សត្រនេះ ត្រូវបានប្រើប្រាស់ជាយូរមកហើយ ដើម្បីទប់ស្កាត់ការប្រឆាំង និងបំបិទការរិះគន់ពីគូប្រជែងនយោបាយ។ ហើយបើយោងតាម TLHR បានឲ្យដឹងថា យ៉ាងហោចណាស់មនុស្ស ២៨៩នាក់ ត្រូវបានចោទប្រកាន់ក្រោមច្បាប់នេះ គិតចាប់តាំងពីឆ្នាំ២០២០ មក៕