មនុស្ស ៦នាក់ត្រូវបានគេប្រទះឃើញស្លាប់នៅតំបន់ភ្នំភាគខាងលិចប្រទេសប៊ុលហ្គារី ក្នុងរយៈពេល ១សប្តាហ៍កន្លងមកនេះ ក្នុងករណីមួយបង្កឲ្យមានការងឿងឆ្ងល់ និងជាករណីស្លាប់ចម្លែក ដែលនាំឲ្យរដ្ឋអាជ្ញាប្រដូចវាទៅនឹងករណីស្លាប់មនុស្សជាចង្កោមម្តង ២-៣នាក់ នៅក្នុងរឿងអាថ៌កំបាំង “Twin Peaks” អំឡុងទសវត្សរ៍ឆ្នាំ ១៩៩០ ។

ក្រុមរដ្ឋអាជ្ញា សង្ស័យករណីស្លាប់មនុស្សនេះ ថាអាចជាការធ្វើអត្តឃាត ឬឃាតកម្ម ដែលជាកង្វះខាតភាពច្បាស់លាស់នាំឲ្យមានការព្យាករ និងទ្រឹស្តីសមគំនិត នៅក្នុងចំណោមពលរដ្ឋប៊ុលហ្គារី ។

កាលពីថ្ងៃអាទិត្យ នគរបាលបានរកឃើញសាកសពមនុស្ស ៣នាក់ រួមទាំងក្មេងប្រុសអាយុ ១៥ឆ្នាំម្នាក់ នៅក្នុងរថយន្តបោះជំរំមួយកន្លែង ស្ថិតក្នុងតំបន់ Okolchitsa Peak ។ 

ក្រុមអ្នកស៊ើបអង្កេតមានជំនឿថា ពួកគេជាប់ពាក់ព័ន្ធនឹងការសម្លាប់មនុស្ស ៣នាក់ ដែលបានកើតឡើងក្នុង ១សប្តាហ៍មុននេះនៅក្នុងខ្ទមលើភ្នំជិតតំបន់ Petrohan ដែលក្រោយមក ត្រូវបានគេដុតចោល ។

ខ្ទមមួយនេះ ត្រូវបានប្រើប្រាស់ជាមូលដ្ឋានរបស់អង្គការក្រៅរដ្ឋាភិបាល ដែលបំពេញការងារ ដើម្បីការពារបរិស្ថាន បើទោះបីជាមនុស្សមួយចំនួនរៀបរាប់ថា ជាក្រុមអនុរក្សព្រៃឈើក៏ដោយ ដែលបានល្បាតតំបន់នោះអស់រយៈពេលជាច្រើនឆ្នាំមកហើយ នៅជិតព្រំដែនស៊ែរប៊ី និងបានជួយនគរបាលព្រំដែន ។

នគរបាលនិយាយថា មនុស្ស ៥នាក់ ក្នុងចំណោមអ្នកស្លាប់ គឺជាសមាជិកទីភ្នាក់ងារជាតិគ្រប់គ្រងតំបន់ការពារ ដែលជាអង្គការក្រៅរដ្ឋាភិបាល ហើយនិងបានរស់នៅក្នុងខ្ទម ។ ក្មេងប្រុសគឺជាកូនរបស់មិត្តិភក្តិម្នាក់ ។ ពុំមានសមាជិកណាម្នាក់របស់ក្រុមមួយនេះ អាចទាក់ទងសុំសេចក្តីអត្ថាធិប្បាយបាននោះទេ ។

នគរបាលបានបញ្ចេញរូបភាពវីដេអូឃ្លីបនៅក្រៅខ្ទមដែលថតបានកាលពីថ្ងៃទី ១ ខែកុម្ភៈ រយៈពេល ១ថ្ងៃ មុនការសម្លាប់ឃើញសមាជិកមនុស្សស្លាប់ទាំង ៦នាក់ លាគ្នាទៅវិញទៅមក ។ មនុស្ស ៣នាក់ដែលបន្តនៅក្នុងខ្ទម ក្រោយមកត្រូវបានគេថតឃើញដុតខ្ទមចោល ៕