ក្រោយដំណើរការប្រកួតជាង ៤ខែ ពានរង្វាន់យុវជនអាយុក្រោម ១៥ឆ្នាំប្រចាំខេត្តស្វាយរៀង (Svay Rieng Cup U15) លើកទី២ ឆ្នាំ២០២៥ នឹងឈានដល់វគ្គផ្ដាច់ព្រ័ត្រ នាថ្ងៃទី១៤ ខែ​កុម្ភៈ ឆ្នាំ២០២៦ ចុងសប្ដាហ៍នេះ រវាងក្រុមយុវជន U15 ព្រះខ័នរាជស្វាយរៀង និង​ក្រុម​គោព្រៃ​ភូមិ​ស្វាយ​ធំ។

មុនឡើងមកកាន់វគ្គផ្ដាច់ព្រ័ត្រ ក្រុមយុវជនទាំងពីរ សុទ្ធតែធ្វើបានល្អរៀងៗខ្លួន ក្នុង​វគ្គ​ជម្រុះ​តាម​ពូល​រហូតដល់វគ្គពាក់កណ្ដាលផ្ដាច់ព្រ័ត្រ ខណៈប្រកួត​ចុង​ក្រោយ​ក្រុមយុ​វជន​ U15 ​ព្រះខ័ន​រាជ​ស្វាយ​រៀង​ បានយកឈ្នះក្រុមសាលាបឋមសិក្សាជ្រៃធំ ៦-០ ខណៈក្រុមយុវជន​គោព្រៃ​ភូមិ​ស្វាយ​ធំ បានយកឈ្នះក្រុមយុវជនសាមគ្គី ២-១។

ក្រុមទាំងពីរ នឹងត្រូវជួបគ្នានៅកីឡដ្ឋានខេត្តស្វាយរៀង ដោយ​មាន​ការ​ផ្សាយ​ផ្ទាល់​លើ​កញ្ចក់​ទូរទស្សន៍ ​BTV ។ ប៉ុន្ដែមុនឈានដល់គូដណ្ដើមជើងឯកនេះ ក៏នឹងមានការប្រកួត​ដណ្ដើម​ចំណាត់​ថ្នាក់​លេខ​៣ រវាងក្រុមយុវជនសាមគ្គី និងក្រុមសាលាបឋមសិក្សាជ្រៃធំ នៅរសៀល​ថ្ងៃ​ជា​មួយ​គ្នា​ផង​ដែរ។

គួរដឹងថា ពានរង្វាន់យុវជនអាយុក្រោម ១៥ឆ្នាំប្រចាំខេត្តស្វាយរៀង លើកទី២ នេះ បានចាប់​ផ្ដើម​ការ​ប្រកួតតាំងពីថ្ងៃទី១១ ខែតុលា ឆ្នាំ២០២៥ ដោយមានបេក្ខភាព ១៥ក្រុមចូលរួម។ ព្រឹត្តិ​ការណ៍​នេះ ​ផ្ដួចផ្ដើមរៀបចំដោយឯកឧត្តម ឌី វិជ្ជា ប្រធានសហភាពសហព័ន្ធយុវជនកម្ពុជា ខេត្ត​ស្វាយរៀង និងជាប្រធានក្លិបព្រះខ័នរាជស្វាយរៀង ដើម្បីបំផុសសកម្មភាពបាល់ទាត់ និង​ផ្ដល់​ឱកាស​ដល់យុវជនតាមបណ្ដាក្រុង-ស្រុកបានចូលរួមប្រកួតប្រជែង ក៏ដូចជាបង្ហាញសមត្ថភាព ដើម្បី​លើក​កម្ពស់សុខភាពផង និងរួមចំណែកអភិវឌ្ឍវិស័យបាល់ទាត់ជាតិផង។

ចំពោះ​ប្រាក់រង្វាន់លើកទឹកចិត្តក្រុមទទួលបានជ័យាលភីឆ្នាំនេះ សម្រាប់ក្រុមជើងឯក នឹង​ទទួល​បាន​ពានមេដាយមាស អមប្រាក់រង្វាន់ ៨លានរៀល, លេខ២ ទទួលបានមេដាយប្រាក់ អម​ប្រាក់​រង្វាន់​ ៤លានរៀល, លេខ៣ ទទួលបានមេដាយសំរឹទ្ធ អមប្រាក់រង្វាន់ ២លានរៀល និងលេខ៤ ទទួលបានប្រាក់រង្វាន់ ១លានរៀលផងដែរ៕ អត្ថបទ លី ឈុនឡា