សភាអឺរ៉ុប បានអនុម័តច្បាប់ថ្មីដែលអនុញ្ញាតឱ្យរដ្ឋជាសមាជិកនិរទេសជនអន្តោប្រវេសន៍ទៅកាន់ប្រទេសដែលមានសុវត្ថិភាពនៅខាងក្រៅសហភាពអឺរ៉ុប ទោះបីជាពួកគេមិនមែនមកពីប្រទេសទាំងនោះក៏ដោយ។ សមាជិកសភាអឺរ៉ុប បានអនុម័តវិធានការនេះកាលពីថ្ងៃអង្គារដោយមានសំឡេងឆ្នោត ៣៩៦ទល់នឹង២២៦ ខណៈសមាជិកនិយមកណ្តាល និងស្តាំនិយម បានគាំទ្រការបោះឆ្នោត។

ក្រោមច្បាប់ថ្មីនេះ រដ្ឋសហភាពអឺរ៉ុបនឹងអាចបញ្ជូនអ្នកស្វែងរកសិទ្ធិជ្រកកោនទៅកាន់ប្រទេសទីបីដែលពួកគេបានឆ្លងកាត់ ដោយនិយាយថាប្រទេសទាំងនោះត្រូវបានចាត់ទុកថាគោរពតាម «បទដ្ឋានអន្តរជាតិ» សម្រាប់ការប្រព្រឹត្តចំពោះជនអន្តោប្រវេសន៍។

ពួកគេក៏អាចនិរទេសអ្នកស្វែងរកសិទ្ធិជ្រកកោនទៅកាន់ប្រទេសទីបីមានសុវត្ថិភាពដែលពួកគេពុំមានទំនាក់ទំនងពីមុនមកប្រសិនបើកិច្ចព្រមព្រៀងត្រូវបានឈានដល់ជាមួយរដ្ឋម្ចាស់ផ្ទះ នេះបើយោងតាមកាសែត Guardian របស់ចក្រភពអង់គ្លេស។ ច្បាប់ទាំងនេះ ត្រូវបានគេរំពឹងថានឹងចូលជាធរមាននៅក្នុងខែមិថុនា។ ចំណាត់ការនេះ បញ្ជាក់ពីការកើនឡើងនៃប្រតិកម្មប្រឆាំងអន្តោប្រវេសន៍នៅទូទាំងសហភាពអឺរ៉ុប ក្នុងរយៈពេលមួយទសវត្សរ៍កន្លងទៅនេះ ដែលបានពង្រីកការគាំទ្រពីប្រជាជនសម្រាប់គណបក្សស្តាំនិយម។ ឯកសារច្បាប់ តម្រូវឱ្យមានការយល់ព្រមជាផ្លូវការចុងក្រោយពីរដ្ឋាភិបាលសមាជិកសហភាពអឺរ៉ុបទាំង២៧ប្រទេស ដោយបង្ហាញពីការរឹតត្បិតយ៉ាងខ្លាំងនៃគោលនយោបាយអន្តោប្រវេសន៍របស់សហភាពអឺរ៉ុប ដែលបានលេចចេញជារូបរាងចាប់តាំងពីលំហូរជនភៀសខ្លួន និងជនអន្តោប្រវេសន៍ជាងមួយលាននាក់ក្នុងឆ្នាំ ២០១៥-២០១៦។ ក្រុមសិទ្ធិមនុស្សបានព្រមានថាគោលនយោបាយនេះអាចត្រូវបានប្រើដើម្បីនិរទេសជនអន្តោប្រវេសន៍ទៅកាន់ប្រទេសដែលពួកគេមិនចង់ទៅ និងអាចត្រូវបានគេប្រព្រឹត្តអាក្រក់។