ក្បួនរថយន្តយោធា ដែលកំពុងដឹកជញ្ជូនអ្នកប្រយុទ្ធឃឺដត្រូវបានគេមើលឃើញនៅក្រុង Hasakah កំពុងដកថយចេញពីសមរភូមិជួរមុខនៅក្នុងទីក្រុងកាលពីថ្ងៃអង្គារ ទី១០ ខែកុម្ភៈ ជាផ្នែកមួយនៃកិច្ចព្រមព្រៀងដែលត្រូវបានចុះហត្ថលេខារវាងរដ្ឋាភិបាលប្រទេសស៊ីរី និងកងកម្លាំងប្រជាធិបតេយ្យស៊ីរីដឹកនាំដោយក្រុមឃឺដ។

ក្នុងពេលជាមួយគ្នានេះ ទីភ្នាក់ងារសារព័ត៌មានរដ្ឋស៊ីរី SANA បានរាយការណ៍ថា កងទ័ពស៊ីរី ក៏បានចាប់ផ្តើមដកថយពីទីក្រុង Hasakah ផងដែរ។

យោងតាមកិច្ចព្រមព្រៀងរវាងឧត្តមសេនីយ៍ Mazloum Abdi និងរដ្ឋាភិបាលទីក្រុងដាម៉ាស កងកម្លាំងយោធាពេលនេះកំពុងដកថយពីសមរភូមិ ហើយកងកម្លាំងរដ្ឋាភិបាល ក៏បានដកថយពីជួរមុខផងដែរ។

កិច្ចព្រមព្រៀងថ្ងៃទី៣០ ខែមករា បានចែងថា ស្ថាប័នគ្រប់គ្រងដែលត្រូវបានបង្កើតឡើងដោយក្រុមជាច្រើនដឹកនាំដោយក្រុមឃឺដនៅភាគឦសាននឹងត្រូវបញ្ចូលគ្នាជាមួយស្ថាប័នរដ្ឋ។ ភាគីទាំងនានា បានប្រកាសពីកិច្ចព្រមព្រៀងនេះបន្ទាប់ពីកងកម្លាំងរដ្ឋាភិបាលក្រោមការដឹកនាំរបស់លោកប្រធានាធិបតី Ahmed al-Sharaa បានដណ្តើមយកតំបន់មួយចំនួននៅភាគខាងជើង និងខាងកើតប្រទេសស៊ីរីពីក្រុមកងកម្លាំងប្រជាធិបតេយ្យស៊ីរី (SDF) ដឹកនាំដោយក្រុមឃឺដ។