ប្រធានាធិបតីអ៊ុយក្រែន លោក Volodymyr Zelenskyy បានកោះប្រជុំមន្ត្រីយោធាជាន់ខ្ពស់របស់លោក កាលពីថ្ងៃអង្គារ (១០ កុម្ភៈ) ដើម្បីពិភាក្សាអំពីចំណុចខ្វះខាតក្នុងការការពារដែនអាកាស និងទិដ្ឋភាពផ្សេងទៀតនៃការការពារជនស៊ីវិល ដើម្បីទប់ទល់នឹងការវាយប្រហារស្ទើរតែរាល់ថ្ងៃអស់ជិត ៤ឆ្នាំនៃសង្គ្រាមរបស់រុស្ស៊ី នៅអ៊ុយក្រែន។

នៅព្រឹកព្រលឹមថ្ងៃពុធ ទី១១ ខែកុម្ភៈនេះ អភិបាលតំបន់អ៊ុយក្រែនបាននិយាយ ការវាយប្រហារថ្មីមួយទៀតរបស់រុស្ស៊ី បានសម្លាប់មនុស្សជាច្រើននាក់ រួមទាំងកុមារតូចៗ ៣នាក់ នៅក្នុងទីប្រជុំជនមួយនៅភាគខាងលិចទីក្រុង Kharkiv ដែលជាទីក្រុងធំទីពីររបស់អ៊ុយក្រែន។

ក្នុងសុន្ទរកថាវីដេអូពេលយប់របស់ខ្លួន លោក Zelenskyy បានលើកឡើងពីការវាយតម្លៃលើរបៀបដោះស្រាយផលវិបាកនៃការវាយប្រហារធំៗរបស់រុស្ស៊ី ក្នុងទីក្រុងនានារបស់អ៊ុយក្រែន ជាពិសេសលើបញ្ហាថាមពលអគ្គិសនី និងកម្ដៅ។ លោក Zelenskyy និយាយថា «ការផ្លាស់ប្តូរជាច្រើនកំពុងកើតឡើងនៅពេលនេះ ក្នុងការងារការពារដែនអាកាស។ នៅតំបន់ខ្លះ ក្រុមប្រតិបត្តិការនានា យន្តហោះស្ទាក់ចាប់ អង្គភាពបាញ់កាំភ្លើងចល័ត និងសមាសធាតុការពារដែនអាកាសតូចៗទាំងមូល កំពុងត្រូវសាងសង់ឡើងវិញទាំងស្រុង»។

ប្រធានាធិបតីរូបនេះ តែងតែចង្អុលបង្ហាញជាញឹកញាប់អំពីការកែលម្អប្រព័ន្ធការពារដែនអាកាសថា ជារឿងដ៏សំខាន់ក្នុងការការពារទីក្រុងនានាពីការវាយប្រហារតាមអាកាសឥតឈប់ឈររបស់រុស្ស៊ី ហើយបានស្នើឱ្យសម្ព័ន្ធមិត្តលោកខាងលិចរបស់ទីក្រុងគីវ ផ្តល់អាវុធបន្ថែមទៀតដើម្បីកម្ទេចមីស៊ីល និងយានដ្រូនដែលហោះចូលដែនអាកាសរបស់ខ្លួន៕