មន្ត្រីអាមេរិកមួយរូបបាននិយាយកាលពីថ្ងៃអង្គារ (១០ កុម្ភៈ) ថា សហរដ្ឋអាមេរិក កំពុងមានគម្រោងបញ្ជូនកងទ័ពប្រហែល ២០០នាក់ ទៅនីហ្សេរីយ៉ា ដើម្បីហ្វឹកហ្វឺនយោធារបស់ប្រទេសអាហ្វ្រិកមួយនេះ ឱ្យប្រយុទ្ធប្រឆាំងនឹងពួកសកម្មប្រយុទ្ធអ៊ិស្លាមនិយម ប៉ុន្មានសប្តាហ៍ប៉ុណ្ណោះបន្ទាប់ពីលោកប្រធានាធិបតីអាមេរិក Donald Trump បានបញ្ជាឱ្យវាយប្រហារតាមអាកាសប្រឆាំងនឹងអ្វីដែលលោកហៅថាជាគោលដៅក្រុមរដ្ឋអ៊ិស្លាម។

កាលពីសប្តាហ៍មុន យោធាអាមេរិក បាននិយាយថា ខ្លួនបញ្ជូនកងទ័ពមួយក្រុមតូចទៅកាន់នីហ្សេរីយ៉ា ប៉ុន្តែមិនបញ្ជាក់ចំនួននោះទេ ដែលនេះគឺជាការទទួលស្គាល់លើកដំបូងបំផុតនៃវត្តមានកងកម្លាំងអាមេរិកនៅទីនោះ ចាប់តាំងពីទីក្រុងវ៉ាស៊ីនតោន បានវាយប្រហារតាមអាកាសទ្រង់ទ្រាយធំប្រឆាំងគោលដៅសកម្មប្រយុទ្ធនៅថ្ងៃបុណ្យណូអែលកន្លងទៅ។

លោក Trump បាននិយាយថា អាចមានសកម្មភាពយោធាបន្ថែមទៀតនៅនីហ្សេរីយ៉ា ខណៈទីភ្នាក់ងារសារព័ត៌មានរ៉យទ័របានរាយការណ៍ថា សហរដ្ឋអាមេរិក បានធ្វើប្រតិបត្តិការហោះហើរឈ្លបយកការណ៍ពីលើប្រទេសនេះ ចេញពីប្រទេសហ្គាណា ចាប់តាំងពីយ៉ាងហោចណាស់ចុងខែវិច្ឆិកាមក។ មន្ត្រីរូបនេះបាននិយាយថា កងទ័ពទាំង ២០០នាក់នោះ នឹងបន្ថែមពីលើបុគ្គលិកយោធាអាមេរិកមួយចំនួនដែលមានស្រាប់នៅនីហ្សេរីយ៉ា ដើម្បីជួយដល់កងកម្លាំងក្នុងតំបន់។

នីហ្សេរីយ៉ា ស្ថិតក្រោមសម្ពាធយ៉ាងខ្លាំងពីទីក្រុងវ៉ាស៊ីនតោន បន្ទាប់ពីលោក Trump បានចោទប្រទេសអាហ្វ្រិកខាងលិចមួយនេះថា បរាជ័យក្នុងការការពារគ្រិស្តបរិស័ទពីពួកសកម្មប្រយុទ្ធអ៊ិស្លាម ដែលកំពុងប្រតិបត្តិការនៅភាគពាយព្យ។ រដ្ឋាភិបាលនីហ្សេរីយ៉ាបានបដិសេធ ដោយនិយាយថា ខ្លួនកំពុងតែកំណត់គោលដៅលើយុទ្ធជនអ៊ិស្លាមនិយម និងក្រុមប្រដាប់អាវុធដទៃទៀត ដែលវាយប្រហារ និងសម្លាប់ទាំងគ្រិស្តបរិស័ទ និងអ្នកកាន់សាសនាអ៊ិស្លាម៕