លោកស្រី Kaja Kallas ប្រធានគោលនយោបាយការបរទេសរបស់សហភាពអឺរ៉ុប បាននិយាយកាលពីថ្ងៃអង្គារ ១០កុម្ភៈសប្ដាហ៍នេះ នៅសន្និសីទព្រំដែនអាកទិកក្នុងប្រទេសន័រវេសថា សហភាពអឺរ៉ុបកំពុងអំពាវនាវឱ្យមានគោលនយោបាយអាកទិកថ្មី ខណៈបញ្ហាប្រឈមសន្តិសុខ និងភូមិសាស្ត្រនយោបាយនៅក្នុងតំបន់កាន់តែធ្ងន់ធ្ងរ។

ថ្លែងទៅកាន់កិច្ចប្រជុំកម្រិតខ្ពស់ លោកស្រី Kallas បានគូសបញ្ជាក់ពីសារៈសំខាន់ជាយុទ្ធសាស្ត្ររបស់កោះហ្គ្រីនលែន ដោយកត់សម្គាល់ពីវត្ថុធាតុដើមសំខាន់ៗ ផ្លូវនាវាមុជទឹកសំខាន់ៗ និងទីតាំងរបស់ដែនដីនេះ ដែលនៅជិតបំផុតនឹងផ្លូវហោះហើរនៃមីស៊ីលផ្លោងរបស់រុស្ស៊ី។  

លោកស្រីបាននិយាយថា ការផ្លាស់ប្តូរគោលនយោបាយរបស់សហរដ្ឋអាមេរិកថ្មីៗនេះ គឺជា "ការផ្លាស់ប្តូររចនាសម្ព័ន្ធ" នៅក្នុងទំនាក់ទំនងឆ្លងមហាសមុទ្រអាត្លង់ទិក ដែលត្រូវបានទទួលអារម្មណ៍យ៉ាងខ្លាំងនៅក្នុងតំបន់ខ្ពស់ខាងជើង(High North)។

ប្រធានគោលនយោបាយការបរទេសរូបនេះបានកត់សម្គាល់ថា "សហភាពអឺរ៉ុបយល់ថា ហ្គ្រីនលែនមានសារៈសំខាន់ជាយុទ្ធសាស្ត្រសម្រាប់សហរដ្ឋអាមេរិក ហើយក៏មានសារៈសំខាន់ជាយុទ្ធសាស្ត្រសម្រាប់ពួកលោកស្រីនៅក្នុងសហភាពអឺរ៉ុបផងដែរ។

លោកស្រី Kallas បានសង្កត់ធ្ងន់ថា អនាគតរបស់ហ្គ្រីនលែនគឺសម្រាប់ប្រជាជនហ្គ្រីនលែន និងប្រទេសដាណឺម៉ាកក្នុងការសម្រេចចិត្ត ដោយបញ្ជាក់ជាថ្មីនូវការគាំទ្ររបស់សហភាពអឺរ៉ុបចំពោះរដ្ឋសមាជិករបស់ខ្លួន គឺប្រទេសដាណឺម៉ាក និងការប្រកាន់ខ្ជាប់នូវធម្មនុញ្ញអង្គការសហប្រជាជាតិ។

លោកស្រីបញ្ជាក់ថាដល់ពេលហើយសម្រាប់គោលនយោបាយតំបន់អាកទិកថ្មីរបស់សហភាពអឺរ៉ុប ដែលឆ្លុះបញ្ចាំងពីសម័យកាលរស់នៅបច្ចុប្បន្ន ដោយផ្អែកលើភាពជាដៃគូដ៏រឹងមាំជាមួយប្រទេសន័រវេស កាណាដា អ៊ីស្លង់ និងប្រទេសអាកទិកដទៃទៀត៕